Prezident Ərdoğan Cümhuriyyətin 102-ci İldönümü münasibətilə xalqa mühüm mesaj ünvanladı

Türkiyə Prezidenti Rəcəb Tayyib Ərdoğan 29 Oktyabr Cümhuriyyət Bayramı münasibətilə yayımladığı təbrik mesajında, zəfərlərlə dolu Türk tarixinin zirvə nöqtələrindən biri olan bu önəmli günü qeyd etdi. O, ölkə hüdudlarında yaşayan 86 milyon vətəndaşın, Şimali Kipr Türk Cümhuriyyətindəki soydaşların və xaricdəki bütün Türkiyə vətəndaşlarının 29 Oktyabr Cümhuriyyət Bayramını təbrik etdiyini bildirdi. Ərdoğan eyni zamanda, ortaq mədəniyyət mirasını bölüşdüyümüz və sevincimizə şərik olan bütün dostlara da milləti adından təşəkkürlərini çatdırdı. Prezident vurğuladı ki, bu gün Cümhuriyyətin 102-ci quruluş ildönümü böyük fəxrlə qeyd edilir.

Prezident Ərdoğan, ölkənin istiqlal və gələcək amallarının millətin qeyd-şərtsiz suverenliyində təcəssüm etdiyi bu müqəddəs günün ölkə, millət və bütün bəşəriyyət üçün xeyirli olmasını arzuladığını söylədi. O, Cümhuriyyətin banisi Qazi Mustafa Kamal Atatürk başda olmaqla, Milli Mübarizəni idarə edərək Cümhuriyyətə gedən yolu açan Qazi Məclisinin bütün üzvlərini şükranla xatırladığını qeyd etdi. Ərdoğan, Malazgirt qələbəsindən Çanaqqala dastanına, Qurtuluş Savaşından 15 İyul dirənişinə qədər, əsrlər boyu qanları və canları ilə bu torpaqları vətən edən bütün qəhrəmanları rəhmətlə yad etdi. Prezident, Türkiyənin həm güclü bir millət, həm də köklü dövlət ənənəsinə sahib olduğunu bütün dünyaya bir daha bəyan etdi. Prezident möhüründəki günəş və onu əhatə edən 16 ulduzun minillik dövlətçilik ənənəsini təmsil etdiyini vurğuladı. Türkiyə Cümhuriyyətinin, çətinliklərə baxmayaraq hürriyyətə və istiqlala dörd əllə sarılan fədakar millətin son sığınacağı olduğunu xatırlatdı. Buna görə də, şəhidlərin və qazilərin əmanətinə sahib çıxmaq və Cümhuriyyəti əbədi yaşatmaq üçün var gücləriylə çalışdıqlarını dedi.

Dövlət başçısı mesajında, ölkənin gələcək hədəflərinə də toxundu. O, "Türkiyə Yüzyılı" (Türkiyə Əsri) hədəfləri istiqamətində, müdafiə sənayesindən iqtisadiyyata, təhsildən enerjiyə və xarici siyasətə qədər hər sahədə ciddi irəliləyişlər əldə etdiklərini bildirdi. Ərdoğan, 6 Fevral 2023-cü il zəlzələsi fəlakətinin yaralarının sarılması prosesinə işarə edərək, ilin sonuna qədər söz verilən 453 min evin açarlarının təhvil veriləcəyini məlumat verdi. O, 86 milyon vətəndaşın hüzur, təhlükəsizlik və rifah içində yaşayacağı "Terrorsuz Türkiyə" məqsədinə doğru inamlı addımlarla getdiklərini vurğuladı. Prezident, milli birlik və həmrəyliyi hədəf alan xaos yaradanlara fürsət vermədən, ölkənin inkişafının qarşısındakı maneələri aşmağa və yayılmacı niyyətləri olanların planlarını pozmağa davam edəcəklərini qeyd etdi.

Ərdoğan, dünya miqyasında müharibə, qarşıdurma və böhranların universial dəyərləri aşındırdığı bir dövrdə, Türkiyənin haqq və həqiqətin müdafiəçisi kimliyi ilə daha ədalətli bir dünya qurulması üçün çalışdığını dilə gətirdi. Xüsusilə Qəzza və Fələstin başda olmaqla, bir çox böhran bölgəsində vasitəçilik fəaliyyətləri, diplomatik təşəbbüslər və humanitar yardımlar sayəsində axan qanı dayandırmağa, yaraları sarmağa və qalıcı sülhə gedən yolu açmağa cəhd etdiklərini bildirdi. Səlcuq Qartalından ilham alan 360 dərəcəlik xarici siyasət vizyonu ilə tarixi və kimliyə layiq şəkildə bütün məsuliyyətləri böyük diqqətlə yerinə yetirməyə davam edəcəklərini dedi. Prezident, bölgədə lider, dünyada hörmətli, böyük, güclü və firavan Türkiyəni hamı ilə birlikdə quracaqlarına əminliyini ifadə edərək, bütün şəhidləri rəhmətlə, qaziləri isə şükranla yad etdi. O, bütün vətəndaşların Cümhuriyyət Bayramını ürəkdən təbrik etdi.