Qəzzada Atəşkəsin Ən Ciddi Pozulması: İsrailin Hava Zərbələrində 104 Nəfər Həlak Oldu

İsrail Ordusu, Fələstin səhiyyə rəsmilərinin məlumatına görə, 66-sı qadın və uşaq olmaqla 104 nəfərin ölümünə səbəb olan güclü hava zərbələrindən sonra Qəzzada atəşkəsin yenidən qüvvədə olduğunu elan etdi. Oktyabrın 10-da başlayan atəşkəsdən bəri qeydə alınan ən qanlı hücumlar kimi yadda qalan bu bombardman, indiyə qədərki ən ciddi atəşkəs pozuntusu sayılır. Qəzzanın müxtəlif yerlərində baş verən hücumlar, səhər saatlarında məcburi köçkün ailələrinin sığındığı binaları və çadır düşərgələrini vurdu. Fələstin Səhiyyə Nazirliyi bildirdi ki, gecə davam edən zərbələr nəticəsində azı 104 nəfər həyatını itirib, 253 nəfər yaralanıb. Həlak olanların 20-si qadın, 46-sı isə uşaq olub.

İsrail Ordusu hücumların səbəbini açıqlayaraq, “müşahidə məntəqələri, silah anbarları, minaatan mövqeləri və tunellər daxil olmaqla çox sayda Hamas hədəfinin vurulduğunu” bildirdi. Açıqlamada həmçinin, aralarında müxtəlif rütbəli 21 komandanın olduğu yüksək vəzifəli Hamas üzvlərinin hədəf alındığı qeyd edildi. Onların 7 oktyabr 2023-cü ildə müharibəni başlatan hücumlarda iştirak etdikləri vurğulandı. İsrail Xarici İşlər Nazirliyinin sözçüsü Oren Marmorstein, atəşkəsin pozulmasının nəticələrinə görə Hamasın məsuliyyət daşıdığını və yüksək sayda mülki itkinin təşkilatın dinc sakinləri “canlı qalxan” kimi istifadə etməsindən qaynaqlandığını iddia etdi. O əlavə etdi ki, bu hücumlar Rəfah şəhərində bir İsrail əsgərinin öldürülməsinə cavab olaraq edilib və Vaşinqtonla tam koordinasiya şəraitində həyata keçirilib.

Baş nazir Binyamin Netanyahu da Hamasın girovların cəsədlərinin təhvil verilməsi ilə bağlı razılaşma şərtlərini pozduğunu dedi. Ancaq Hamas bütün bu iddiaları rədd etdi, atəşkəsi pozan tərəfin İsrail olduğunu bildirdi. Hamas zərbələr səbəbindən başqa bir girovun cəsədinin təhvil verilməsini təxirə salacağını açıqladı. Atəşkəsin yenidən qüvvəyə mindiyi elan edildikdən sonra belə, İsrail Ordusu şimali Qəzzada "yaxınlaşan hücum üçün silah saxlanılan bir sahəni" hədəf aldığını deyərək daha bir hava zərbəsi endirdi. Hazırda Qəzzada hələ də 13 girovun cəsədi qalır. Hamas bu cəsədləri tapmaqda çətinlik çəkdiyini desə də, İsrail bunu “qəsdən gecikdirmə” adlandırır. Bu cəsədlərin qaytarılmasının yubanması atəşkəsin növbəti – silahsızlandırma və idarəetmə kimi daha mürəkkəb mərhələsinə keçidi çətinləşdirir.

Hadisələrə beynəlxalq münasibət də birmənalı olmadı. Asiya səfərində olan ABŞ Prezidenti Donald Tramp İsrail əsgərinin öldürülməsindən sonra edilən hücumları müdafiə edərək, İsrailin "cavab verməkdə haqlı" olduğunu bildirdi. Tramp, zorakılığın artmasının atəşkəsi pozacağına inanmadığını vurğuladı və "Hamas, Yaxın Şərq sülhünün ümumi mənzərəsində çox kiçik bir hissədir və özünü yaxşı aparmalıdır" dedi. Əks halda Hamasın məhv ediləcəyini əlavə etdi. Atəşkəs razılaşmasında vasitəçi kimi çıxış edən Qətərin Baş naziri Şeyx Məhəmməd bin Əbdürrəhman Al Sani isə Rəfahdakı hücumla Hamas arasında əlaqənin qeyri-müəyyən olmasına baxmayaraq, "Fələstin tərəfindən pozuntu yaşandığını" təsdiqlədi. O, vəziyyətin son dərəcə məyusedici olduğunu və atəşkəsin davamlılığını təmin etmək üçün hər iki tərəflə sıx əlaqədə olduqlarını söylədi.