Qəzzada hərbi əməliyyatlar: İsrail ABŞ-ın icazəsi olmadan heç bir addım ata bilmir

İsrailin Qəzza zolağında həyata keçirdiyi hərbi addımlar üçün Amerika Birləşmiş Ştatlarının (ABŞ) razılığını almaq məcburiyyətində qalması ortaya çıxıb. İsrail dövlət televiziyası KAN bu barədə İsrail təhlükəsizlik mənbələrinə istinadən məlumat yayıb. Məlumatda Tel Əviv rəhbərliyinin atmaq istədiyi bəzi addımların ABŞ tərəfindən təsdiqlənəcəyinə ümid edildiyi, lakin tam sərbəst hərəkət edə bilmədiyi qeyd olunur.

Adını açıqlamayan İsrail rəsmiləri bu məsələni birbaşa təsdiqləyərək, ölkələrinin hərbi qərarlarının məhdudlaşdırıldığını bildiriblər. Onlar deyiblər: “Qəzzada atılacaq hər addım üçün ABŞ-ın razılığı alınmalıdır. İstədiyimiz hər şeyi edə bilmərik.” Baş nazir Binyamin Netanyahunun ABŞ rəsmiləri ilə keçirdiyi görüşlərdə bu məhdudiyyətlə bağlı mesajın açıq şəkildə çatdırıldığı vurğulanır. Səlahiyyətli şəxslər, ABŞ-ın qoyduğu qadağalar səbəbindən istədikləri hər şeyi edə bilmədiklərini etiraf ediblər. Onlar bəzi addımların təsdiqlənməsini, bəzilərinin isə veto ediləcəyini gözləyirlər. Bu vəziyyət regionda İsrailin hərbi strategiyası üzərində güclü xarici nəzarətin olduğunu göstərir. Netanyahunun hətta atəşkəs razılaşmasından sonra İsrailin işğalında qalan "Sarı Xəttin" (Sarı Hat) genişləndirilməsi qərarını verdikdən sonra koordinasiya üçün ABŞ-ın yüksək səviyyəli nümayəndələri ilə görüşdüyü bildirilib.

Qeyd edilən siyasi məhdudiyyətlərə baxmayaraq, İsrail atəşkəs rejimini pozaraq Qəzzaya hücumları yenidən başlatdı. Rəsmi Təl Əviv, ilk olaraq Həması Qəzzadakı əsirlərin cəsədlərini təhvil verməməkdə günahlandırdı. Daha sonra axşam saatlarında Rəfahda İsrail əsgərlərinə atəş açıldığı iddia edildi. İsrail Baş Nazirliyinin Ofisindən verilən açıqlamada, Netanyahunun keçirilən təhlükəsizlik məsləhətləşmələri nəticəsində Həmasın atəşkəsi pozduğu iddiası ilə orduya Qəzza zolağına şiddətli zərbələr endirmək əmri verdiyi bildirildi. Həmas isə Rəfahdakı hadisə ilə əlaqəsinin olmadığını və İsrailin atəşkəsi pozmaq üçün sadəcə bəhanə axtardığını söyləyib. İsrail ordusunun hava hücumları nəticəsində Qəzza zolağının müxtəlif bölgələrində indiyədək 9 Fələstinlinin həyatını itirdiyi və çox sayda insanın yaralandığı məlum olub.