Qəzzada Müharibənin Dəhşətli Nəticələri: 20 Mindən Çox Uşaq Həlak Olub, Minlərlə Uşaq Əlil Qalıb

İsrailin Qəzza zolağında iki il davam edən soyqırımının nisbətən səngiməsinə baxmayaraq, Fələstinli uşaqların yaraları sağalmaq bilmir. Bu yaralar tükənməz bir faciənin əlamətləridir və qanlı hücumlar həyata keçirən İsrail ordusunun körpə bədənlərdə, günahsız ruhlarda buraxdığı ağrının miqyasını göstərir. Müharibənin dəhşətli izləri ətrafdakı hər şeyi dağıdıb, xüsusən də yüz minlərlə uşağın həyatında dərin izlər buraxıb; onlar ya əzasını, ya duyğularını, ya da yaxınlarını itiriblər. Qəzzadakı Hökumətin Media Ofisinin və Səhiyyə Nazirliyinin məlumatlarına görə, bu soyqırım nəticəsində təxminən 68,643 Fələstinli həyatını itirib. Həlak olanlar arasında 20 mindən çox uşaq var. Bu rəqəm müasir tarixdə mülki əhaliyə qarşı yönəlmiş ən qanlı hücumlardan biri kimi qeydə alınıb.

Həlak olan körpələr arasında bir yaşını tamamlamamış 1015 uşaq, həmçinin doğulduqdan cəmi bir neçə gün sonra həyatını itirən 450 yenidoğulmuş körpə var. Bu fəlakətli rəqəmlərə əlavə olaraq, köçkünlük şəraitində nə soyuqdan, nə də istidən qorunmayan köhnə çadırlarda yaşayan 14 uşaq da soyuq hava səbəbindən həyatını itirib. İsrail hücumları nəticəsində Qəzzada 56 mindən çox uşaq anasını, atasını, yaxud hər ikisini itirərək, itki və qorxu arasında yaşamağa məhkum olan yeni bir “yetimlər nəsli” yaratmışdır. Bölgədəki ağır blokada səbəbindən humanitar yardımların, dərmanların və uşaq qidalarının çatdırılmasına maneələr törədildiyi üçün, 154 uşaq şiddətli qidalanma çatışmazlığından dünyasını dəyişib. Bu, sağlamlıq sisteminin tamamilə çökməsi ilə birlikdə, bölgədəki humanitar vəziyyətin nə qədər gərgin olduğunu göstərir.

Dağılmış səhiyyə sistemi şəraitində, beş min ikiyüzdən (5200) çox uşaq həyatda qalmaq üçün təcili tibbi təxliyə gözləyir və keçən hər an onların sağ qalma ümidlərini azaldır. Media Ofisinin məlumatları yaralananlar arasında təxminən 4,800 əza itkisi hadisəsi qeydə alındığını göstərir və bu acı tablonun 18 faizini uşaqlar təşkil edir. Birləşmiş Millətlər Təşkilatının Əlillərin Hüquqları Komitəsinin yayımladığı bir bəyanata əsasən, hücumlar başlayandan bəri Qəzzada ən az 21 min uşaq əlilliklə mübarizə aparır. Müharibədə yaralanan 40 min 500-dən çox uşağın yarısından çoxu ömürlük əlilliklə yaşamağa məcburdur, onların balaca bədənləri müharibənin amansız izlərini daşıyır.

BMT-nin Uşaqlara Yardım Fondu (UNICEF) tərəfindən 8 Oktyabrda yayımlanan hesabatda bildirilir ki, son iki il ərzində Qəzzada təxminən 64 min uşaq ya həyatını itirib, ya da ağır xəsarət alıb; bunlardan ən az 1000 yenidoğulmuş həyatını itirmişdir. UNICEF hesabatında bu gün Qəzzada təxminən bir milyon uşağın “dünyadakı ən təhlükəli yerdə” yaşadığı vurğulanır. Hamas və İsrail arasında 10 Oktyabrda Misir, Qətər və Türkiyə vasitəsilə, ABŞ-ın nəzarəti ilə əldə edilən atəşkəs və əsir mübadiləsi müqaviləsi hücumları dayandırsa da, bu qanlı müharibənin vurduğu ağrı uşaqların simasından silinməyib. İki il davam edən müharibə nisbi şəkildə sona çatsa da, Qəzzadakı dağıntı o qədər böyükdür ki, onun bərpası üçün təxminən 70 milyard dollar xərc tələb olunacağı təxmin edilir. Əzalarını itirənlər, yaxın zamanda müalicəyə çatmayacağını bilənlər və yaddaşlarında müharibənin unudulmaz görüntülərini daşıyanlar böyük çətinliklərlə yaşamağa davam edirlər.