Sergey Lavrov və Çoe Son-hui görüşü: Moskva Şimali Koreyanın Ukrayna Böhranı Mövqeyinə Görə Minntdarlığını Bildirdi

Rusiya Federasiyasının Xarici İşlər Naziri Sergey Lavrov Şimali Koreyadan rəsmi səfər üçün Moskvaya gələn həmkarı Çoe Son-hui ilə paytaxtda görüş keçirib. Bu yüksək səviyyəli görüşdə tərəflər ikitərəfli əlaqələri və regional vəziyyəti ətraflı şəkildə müzakirə ediblər. Lavrov görüşün əvvəlində çıxış edərək Rusiya və Şimali Koreya arasındakı münasibətlərin sürətlə inkişaf etdiyini bildirib.

Rusiya XİN rəhbəri Lavrov, xüsusilə, rəsmi Pxenyanın Ukrayna böhranı ilə bağlı nümayiş etdirdiyi mövqeyə görə Şimali Koreya rəhbərliyinə dərin minnətdarlıq ifadə edib. O, həmçinin Şimali Koreya əsgərlərinin Rusiyanın Kursk vilayəti ərazisinin Ukrayna əsgərlərindən təmizlənməsi prosesində verdiyi dəstəyə yüksək qiymət verdiklərini vurğulayıb. Lavrov, Çoe ilə danışıqlar zamanı Koreya Yarımadası və ümumilikdə Avrasiya regionundakı vəziyyət də daxil olmaqla, ikitərəfli əməkdaşlıq məsələlərini geniş şəkildə nəzərdən keçirəcəklərini qeyd edib.

Şimali Koreyanın Xarici İşlər Naziri Çoe Son-hui isə öz növbəsində Moskva ilə əlaqələrin hərtərəfli strateji tərəfdaşlıq sazişi çərçivəsində bütün sahələrdə inkişaf etdiyini təsdiqləyib. Nazir Rusiya rəhbərliyinin ölkənin suverenliyini, ərazi bütövlüyünü və beynəlxalq ədalətin qorunmasına yönəlmiş siyasətini dəstəklədiklərini xüsusi vurğulayıb. Bu bəyanatlar iki ölkə arasındakı siyasi və diplomatik bağlılığın hazırda ən yüksək səviyyədə olduğunu göstərir.