Şimali Kıbrıs Türk Cümhuriyyətinin Yeni Prezidenti Tufan Erhürman: İlk Səfərim Türkiyəyə Olacaq

Şimali Kıbrıs Türk Cümhuriyyətində (ŞKTC) keçirilən prezident seçkilərinin nəticələrinə əsasən, Cümhuriyyətçi Türk Partiyasının (CTP) sədri Tufan Erhürman dövlət başçısı seçilib. O, səslərin 62,76 faizini toplayaraq rəqibi, müstəqil namizəd Ersin Tatarı (35,81 faiz səs) böyük fərqlə geridə qoyub. Seçkilərdə ümumi iştirak faizi 64,87 olaraq qeydə alınıb. ŞKTC-nin 6-cı Prezidenti seçilən Tufan Erhürman mandatını aldıqdan sonra ölkə xarici siyasəti və dövlət ənənələri haqqında ilk açıqlamalarını verib.

Erhürman “Türkiye Gazetesi”nə verdiyi müsahibədə, onun rəhbərliyinin ŞKTC-də daha əvvəl prezidentlik etmiş liderlərin ənənəsini davam etdirəcəyini vurğulayıb. Yeni Prezident qeyd edib ki, istər danışıqlar prosesləri, istərsə də Kipr məsələsi və xarici siyasətlə bağlı digər əhəmiyyətli məsələlər Ankarayla sıx məsləhətləşmələr və uyğunluq şəraitində idarə olunacaq. O bildirib ki, bu cür əməkdaşlıq ənənəsinin indiyə qədər olduğu kimi, bundan sonra da davam edəcəyinə heç kimin şübhəsi olmamalıdır. Erhürman öz vəzifəsinin iki dövlət və qardaş xalq arasındakı əlaqələri daha yüksək səviyyəyə qaldırmaq olduğunu ifadə edib.

Dövlət başçısının sözlərinə görə, ŞKTC prezidentlərinin ilk rəsmi səfərlərini Türkiyə Cümhuriyyətinə etməsi ölkənin qəbul olunmuş dövlət ənənəsidir. Seçilmiş Prezident cümə günü andiçmə mərasiminin keçiriləcəyini, bu mərasimdən dərhal sonra Türkiyəyə səfər proqramının təşkili üçün lazımi təşəbbüslərə başlanacağını bildirib. Erhürman 1970-ci ildə doğulub və təhsilini Türkiyədə tamamlayıb. O, orta təhsilini Türk Maarif Kollecində başa vurduqdan sonra 1988-ci ildə Ankara Universitetinin Hüquq Fakültəsinə daxil olub. O, magistr və doktorluq dərəcələrini də Ankara Universitetindən alıb. Onun 2001-ci ildəki doktorluq dissertasiyası “Qurumun və Ombudsmanının Hüquq Xarici Nəzarəti” mövzusuna həsr edilmişdi.

Tufan Erhürman siyasətə gəlməzdən əvvəl zəngin akademik və hüquqi təcrübəyə sahib olub. O, 1995-2001-ci illərdə Ankara, Orta Şərq Texniki və Hacettepe Universitetlərində ictimai hüquq dərsləri verib. Həmçinin, 1999-2004-cü illər arasında Türkiyə Ədliyyə Nazirliyində çalışmış və Türkiyədə ombudsmanlıq institutunun yaradılmasında iştirak edib. Erhürman 2008-2010-cu illərdə Prezident Mehmet Əli Talatın dövründə Kipr məsələsinin həlli ilə bağlı aparılan danışıqlarda aktiv iştirakçı olub. O, 2013-cü ildən millət vəkili olaraq fəaliyyət göstərib, 2016-cı ilin noyabrında CTP-nin rəhbəri seçilib. Erhürman 2018-ci ilin yanvarından 2019-cu ilin mayınadək dörd partiyalı koalisiyaya rəhbərlik edərək ŞKTC Baş Naziri vəzifəsini icra etmişdi.