Şimali Koreya Yeni Hipersonik Raketlərin Sınağını Təsdiqlədi: Hədəflər Uğurla Vuruldu

Şimali Koreya hökuməti yeni və ən son texnologiya ilə hazırlanan bir silah sisteminin sınaqdan keçirildiyini rəsmi şəkildə elan edib. Verilən açıqlamaya əsasən, bu sınaq çərçivəsində atılan iki hipersonik raket hədəfləri tamamilə dəqiqliklə vurub. Pxenyan rəhbərliyi dünən həyata keçirilən raket sınağını təsdiqləyərək, ölkənin Raket İdarəsinin "son model və əhəmiyyətli bir silah sistemi" üzərində işlədiyini bildirib. Məlumatda qeyd olunur ki, paytaxt Pxenyandan buraxılan bu raketlər Şimali Hamqyonq əyalətindəki Ojanq bölgəsində yerləşən təyin olunmuş hədəfi uğurla məhv edib. Şimali Koreya sınağın strateji çəkindirmə qabiliyyətini artırmağa hədəflənmiş müdafiə proqramının bir hissəsi olduğunu vurğulayıb.

Sınaq prosesinə Koreya Əmək Partiyası (KƏP) Mərkəzi Komitəsinin katibi Pak Conq nəzarət edib. O, yeni silah sistemini yüksək qiymətləndirərək onu "strateji bir dəyər" kimi xarakterizə edib. Pak Conqun sözlərinə görə, bu növ fəaliyyətlərin əsas məqsədi müharibənin qarşısını almaq üçün çəkindirmə qüvvəsini artırmaq və ölkənin ümumi müdafiə imkanlarını möhkəmləndirməkdir. Sınaqla bağlı maraqlı məqam isə Şimali Koreya lideri Kim Conq Unun bu atışlarda iştirak etməməsidir. Pxenyan hökuməti hansı növ hipersonik raketlərin istifadə edilməsinə dair hər hansı ətraflı məlumat verməkdən çəkindi.

Cənubi Koreyadakı hərbi mənbələr isə fərqli bir ehtimal irəli sürüblər. Onların şərhinə görə, sınaqda istifadə edilmiş silah növü "Hwasongpho-11-Da-4.5" adlı taktiki ballistik raket ola bilər. Qeyd edək ki, Cənubi Koreya Baş Qərargah Rəisləri Komitəsi (JCS) hələ dünən Şimali Koreyanın səhər saat 08:10 radələrində Şərq dənizi (Yaponiya dənizi) istiqamətinə bir neçə qısa mənzilli ballistik raket atdığını açıqlamışdı. Bu raket sınağı həm Cənubi Koreyada, həm də Yaponiyada hökumət səviyyəsində baş verən dəyişikliklərdən sonra ilk belə hadisə kimi qeydə alınıb.

Bu hərbi manevr oktyabrın 31-dən noyabrın 1-dək Cənubi Koreyanın ev sahibliyi edəcəyi Asiya-Sakit Okean İqtisadi Əməkdaşlıq (APEC) sammiti ərəfəsində reallaşdı. Bu sınaq hərbi analitiklər tərəfindən Cənubi Koreya, Yaponiya və ABŞ arasında qurulan ittifaqa qarşı yönəlmiş bir güc nümayişi və gözdağı kimi şərh edildi. Pxenyanın yüksək texnologiyalı silahlar barədə açıqlamaları regional gərginliyi artırır, ölkənin müdafiə qabiliyyətini genişləndirmək məqsədi daşıyan bu addımlar beynəlxalq səviyyədə narahatlıq yaradır.