Türkiyə XİN rəhbəri Hakan Fidan Qəzza Sammitindən sonra: Sülh prosesini sabotaj edənlərə yer yoxdur

Xarici İşlər Naziri Hakan Fidanın ev sahibliyi ilə İstanbulda keçirilən “Qəzza Zirvəsi” başa çatdı. Görüşdə Türkiyə ilə yanaşı, Birləşmiş Ərəb Əmirlikləri, İndoneziya, Qətər, Pakistan, Səudiyyə Ərəbistanı və İordaniyanın xarici işlər nazirləri iştirak edirdi. Zirvənin sonunda Hakan Fidan birgə bəyanatla çıxış edərək prosesi pozmağa çalışanlara kəskin xəbərdarlıq etdi.

O bildirdi ki, "Əsassız bəhanələr uydurmağa, prosesi baltalamaq üçün səbəblərə sığınmağa ehtiyac yoxdur. Atəşkəsi pozan, sülhə mane olan heç bir hərəkətə icazə verilməməlidir." Fidan Fələstinlilərin iradəsinin cavab tapmasının vacibliyini xüsusi vurğuladı. Sülhə aparan yol qorunmalıdır; bu, səbir və qətiyyət tələb edən bir yoldur. Biz bu fəzilətlərə malik ölkələr olaraq bu yolda irəliləməyə davam edəcəyik.

Nazir Fidan, sammitdə danışılan digər əhəmiyyətli məqamlara da toxundu. O qeyd etdi ki, HƏMAS Qəzzanın idarəçiliyini Fələstinlilərdən ibarət bir komitəyə təhvil verməyə hazırdır. Belə tənzimləmələr Fələstin xalqının hüquqlarını qoruyacağı təqdirdə, zamana və təxribatlara qarşı dayanıqlı olacaq. Görüş iştirakçıları həmçinin yaxın günlərdə yaradılması nəzərdə tutulan beynəlxalq sabitləşdirmə qüvvəsinin fəaliyyət dairəsi və formalaşdırılması ilə bağlı məsələləri müzakirə etdilər. Bu prosesin razılaşmanın vasitəçiləri və Fələstin tərəfi ilə tam həmrəylik şəraitində həyata keçirilməsi barədə yekdil fikir mövcuddur. Qəzzanın yenidən qurulması, eyni zamanda Fələstin xalqının ümidlərinin və gələcəyə olan inamının bərpasını da tələb edir.

Yeddi ölkənin nümayəndələri Fələstinlilərarası uzlaşma səylərinin tezliklə nəticə verməsini arzulayırlar və bu istiqamətdə aparılan təmasları müsbət qarşıladıqlarını bildirirlər. Fələstinlilər arasında birlik əldə edilməsi, Fələstinin beynəlxalq ictimaiyyətdə təmsilçiliyini daha da gücləndirəcək. Zirvədə iştirak edən ölkələr ortaq məsuliyyət hissi ilə bir araya gəldilər və sülh yolundan dönməyəcəklərini bir daha təsdiqlədilər.