Yaponiyada Siyasi Mənzərə Dəyişir: LDP Oppozisiya ilə Koalisiya Müqaviləsi Bağladı

Yaponiyada hakim Liberla Demokrat Partiyası (LDP) müxalifətdəki Nippon İşin (JIP) partiyası ilə koalisiya müqaviləsi imzalayaraq ölkə daxilindəki siyasi balansını bərpa etdi. Bu hadisə Baş nazir İşiba Şiqerunun keçən ay istefa verəcəyini açıqlamasından sonra yeni hökumət başçısının seçilməsi hazırlıqları fonunda baş verir. LDP-nin əvvəlki ortağı Komeito partiyasının koalisiyadan ayrılması ilə partiyanın mövqeyi zəifləmişdi. Lakin Kyodo agentliyinin məlumatına görə, LDP-nin yeni lideri Takaiçi Sanayenin apardığı inandırma danışıqları müsbət nəticə verdi.

Nippon İşin partiyasının lideri Yoşimura Hirofumi jurnalistlərə verdiyi açıqlamada, Takaiçi ilə görüşdüyünü və partiyasının LDP ilə rəsmi şəkildə koalisiya qurmaq niyyətində olduğunu təsdiqlədi. O qeyd etdi ki, məqsəd "Yaponiyanı birlikdə irəliyə daşımaqdır". Bu yeni ittifaq sayəsində, Komeitonun ayrılması səbəbindən LDP əleyhinə dəyişən siyasi vəziyyət yenidən partiyanın lehinə çevrildi. Koalisiya razılaşmasına əsasən, JIP millət vəkilləri Parlamentdə LDP lideri Takaiçiyə dəstək verəcəklər. Bu dəstək, Takaiçinin bu həftə keçiriləcək iclasda Baş nazir seçilməsinə tam zəmanət verir. Müqavilədə həmçinin istehlak vergisinin müvəqqəti ləğvi, eyni zamanda korporativ səviyyədə siyasi ianələrin qadağan edilməsi istiqamətində səy göstəriləcəyi bildirilir.

LDP ilə ittifaqa girən Nippon İşin, yerli dildə "Yaponiyanın Bərpası" mənasını daşıyır və 2015-ci ildə Osaka mərkəzli qurulub. Partiya "birbaşa islahat" şüarı ilə hərəkət edir. Neoliberalizmin tərəfdarı olan JIP, konstitusiya dəyişikliyi, pulsuz təhsilin təmin edilməsi və ABŞ hərbi bazalarının ölkə üzərindəki yükünün azaldılması kimi hədəfləri dəstəkləyir. Baş nazir İşiba Şiqerunun istefasına səbəb isə iyul ayında keçirilmiş Müşavirlər Palatası (Sangiin) seçkilərində LDP-nin gözlənilən nəticələri əldə etməməsi olmuşdu. O, seçkilərin hökumətdə mənfi təsirə malik olduğunu bildirmişdi. İşiba xatırlatmışdı ki, hakim LDP və koalisiya ortağı Komeito parlamentdəki çoxluğu itirdi. Məğlubiyyətin məsuliyyətini öz üzərinə götürən İşiba, Baş nazir və LDP sədri vəzifələrindən istefa etdi. Hakim koalisiya, seçkidə hədəflədiyi ən azı 50 yerə çata bilməyib və yuxarı palatada çoxluğu itirib. Bu yeni koalisiyanın qurulması ilə əsas müxalifət olan Konstitusiya Demokrat Partiyasının (CDP) rəhbərlik etdiyi "ortaq yeni namizəd" layihəsinin uğursuzluğa düçar olacağı ehtimal edilir.