Zelenski ABŞ-ın Sülh Planını Müzakirə Etmək Məqsədilə İsveçrədə - Rusiyanın Kütləvi Hücumları Davam Edir

Ukrayna Prezidenti Volodimir Zelenski Rusya-Ukrayna müharibəsinə son qoymaq üçün Amerika Birləşmiş Ştatlarının hazırladığı “sülh planını” müzakirə etmək məqsədilə bu gün İsveçrədə yüksək səviyyəli görüş keçiriləcəyini açıqlayıb. Zelenski öz sosial media hesabından yaydığı məlumatda bildirib ki, Ukrayna nümayəndə heyəti ABŞ, Almaniya, Fransa və Böyük Britaniya təmsilçiləri ilə bir araya gələcək.

Prezident vurğulayıb ki, diplomatik fəaliyyətlər davam etsə də, Rusiya təcavüzünə qarşı müdafiə qabiliyyətini gücləndirmək üçün mümkün olan hər şeyi etmək lazımdır. Zelenski, bu görüşün müttəfiq ölkələrin plan üzərində birgə işləməsini təmin edəcəyini qeyd edib. Lakin o əlavə edib ki, danışıqlara paralel olaraq, hərbi sahədə də irəliləyişlər əldə edilməlidir. Hava hücumundan müdafiə sistemləri və raketlər mövzusunda tərəfdaşlarla əldə edilmiş bütün razılaşmaların həyata keçirilməsini sürətləndirmək son dərəcə vacibdir.

Prezident Zelenski son bir həftədə Rusiyanın Ukraynaya qarşı istifadə etdiyi hücum vasitələrinin statistikasını paylaşaraq vəziyyətin ciddiliyini göstərib. Məlumata görə, Rusiya ordusu son yeddi gündə 1050-dən çox pilotsuz uçuş aparatı (PUA), təxminən 1000 idarə olunan hava bombası və 60-dan artıq müxtəlif tipli raketdən istifadə edib. Bu kütləvi hücumlar müdafiə ehtiyaclarının təcili çatdırılması tələbini daha da artırır.

Zelenski həmçinin noyabrın 19-da raket zərbəsinə məruz qalan Ternopil şəhərindəki ağır nəticələrə toxunub. Şəhərdə dörd gün davam edən axtarış və xilasetmə işləri dünən başa çatıb. Təəssüf ki, hücum nəticəsində 6-sı uşaq olmaqla 33 nəfər həyatını itirib, altı nəfər isə hələ də itkin düşmüş sayılır. Zelenski çıxışının sonunda həyatları qorumağa kömək edən və sülh üçün çalışan hər kəsə minnətdarlığını bildirərək, ölkəsinin həyatının qorunması üçün mübarizəni davam etdirəcəyini qeyd edib.