Albaniyada Süni Zəka Naziri Təyin Edildi

Albaniya hökumətində süni zəka inqilabı yaşanır! Dünyanın ilk süni zəka naziri olan “Diella” dövlət satınalmaları üzrə nəzarəti öz üzərinə götürüb.

Baş nazir Edi Rama, “günəş” mənasını verən Diella-nın yeni hökumətdə korrupsiyadan azad, tamamilə şəffaf bir dövlət idarəçiliyini təmin edəcəyini bildirib. May ayında keçirilən seçkilərdə qalib gələn Rama, yeni kabinet üzvlərini, o cümlədən virtual nazir Diellanı Sosialist Partiyasının iclasında təqdim edib.

Diella bütün dövlət satınalmaları ilə bağlı qərarlar qəbul etməklə vəzifələndirilib. Bu addım dövlət vəsaitlərinin korrupsiyadan uzaq və şəffaf idarə olunmasını təmin etmək məqsədi daşıyır.

Yanvar ayından bəri virtual assistent kimi fəaliyyət göstərən Diella, ənənəvi Alban kostyumunda olan bir qadına bənzədilərək dizayn edilib. O, e-Albaniya platforması vasitəsilə vətəndaşların sənəd və xidmətlərə çıxışını asanlaşdırıb. Rəsmi məlumatlara görə, virtual assistent indiyədək 36.600 rəqəmsal sənəd hazırlayıb və təxminən 1000 xidmət göstərib.

Baş nazir Edi Rama yeni kabinetini parlamentə təqdim etməyə hazırlaşır. 2,8 milyon əhalisi olan bu Balkan ölkəsi üçün korrupsiyaya qarşı mübarizə və dövlət idarəçiliyində şəffaflığın təmin edilməsi Avropa İttifaqına üzvlük üçün əsas meyarlardandır. Rama ölkəsini 2030-cu ilədək Aİ-yə qəbul etməyi hədəfləyir. Süni zəkanın siyasi təzyiqlərdən və korrupsiya risklərindən azad olacağı fikri uzun müddətdir müzakirə olunur. Albaniya bu ideyanı gerçəkləşdirmək istiqamətində konkret addımlar atan ilk ölkələr sırasındadır.