Apple Çip Dizaynında Süni Zəkanı İnteqrasiya Edə Bilər

Apple şirkəti öz cihazlarında istifadə etdiyi çiplərin dizayn prosesində yaradıcı süni zəkanın tətbiqi istiqamətində araşdırmalar aparır. Şirkətin Aparat Texnologiyaları meneceri Coni Sroucinin verdiyi məlumata görə, Apple bu sahədəki inkişafları diqqətlə izləyir və süni zəkanın çip dizaynı kimi mürəkkəb proseslərdə səmərəlilik baxımından ciddi töhfələr verə biləcəyini düşünür. Srouci, elektron dizayn avtomatlaşdırması (EDA) proqram təminatında yaradıcı süni zəka tətbiqlərinin Apple üçün əhəmiyyətini vurğulayıb. Onun sözlərinə görə, bu sistemlər çip arxitekturasının mürəkkəbliyinin idarə olunmasında əsas rol oynayır və dizayn prosesini sürətləndirmək potensialına malikdir.

Qeyd edək ki, Apple əvvəlcə iPhone və iPad kimi mobil cihazlar üçün hazırlamağa başladığı xüsusi prosessorları 2020-ci ildə tanıtdığı M seriyası çipləri ilə kompüter seqmentinə inteqrasiya edərək Mac məhsul xəttinə daxil edib. Bu keçid ilə Intel-in x86 arxitekturasından uzaqlaşılıb və ARM əsaslı Apple Silicon arxitekturası qəbul edilib. M1 çipi bu transformasiyanın ilk nümunəsi olub və şirkətin bu prosesdə böyük texniki və strateji risk götürdüyü vurğulanıb.

Çip dizayn prosesinə süni zəkanın inteqrasiya edilməsi planı sənaye üzrə baş verən ümumi transformasiya ilə üst-üstə düşür. Cadence və Synopsys kimi sənaye nəhəngləri EDA proqram təminatında süni zəkanın tətbiqini artırmaq üçün rəqabət aparırlar. Apple-ın bu sahədəki təşəbbüsü yaradıcı süni zəkanın yalnız proqram tərəfində deyil, həm də aparat inkişaf proseslərində daha intensiv rol oynamağa başladığını göstərir.