Apple, Süni Zəkaya Tam Güclə Yönəlir

Apple-ın baş direktoru Tim Kuk, şirkət əməkdaşları ilə qapalı qapılar arxasında keçirilən görüşdə süni zəkaya olan öhdəliklərini açıq şəkildə ifadə edib. Cümə günü keçirilən görüşdə Kuk, süni zəkanı internet, smartfonlar, bulud texnologiyaları və mobil tətbiqlər kimi texnoloji inqilab adlandırıb və Apple-ın bu yarışda mütləq qalib gəlməli olduğunu vurğulayıb.

Kuk, şirkətin ikinci rüblük maliyyə nəticələrini elan etdiyi gündən bir gün əvvəl investorlarla görüşdən dərhal sonra bu bəyanatları verib. Həmin görüşdə o, Apple-ın süni zəkaya yatırımlarını “əhəmiyyətli dərəcədə” artıracağını bildirib. Əməkdaşlarla görüşdə isə Kuk bu mesajı təkrarlayaraq, “Apple bunu etməlidir. Apple bunu edəcək. Bu bizim üçün bir fürsətdir. Bunu etmək üçün lazımi investisiyalar edəcəyik” deyə vurğulayıb.

Kuk həmçinin, görüşdə Apple-ın məhsul inkişaf fəlsəfəsinə toxunaraq, şirkətin tez-tez ilk bazara çıxan olmadığını, amma bazara girəndə standartı müəyyənləşdirən olduğunu qeyd edib. Macintosh-dan əvvəl şəxsi kompüterlərin, iPhone-dan əvvəl smartfonların, iPad-dən əvvəl planşetlərin və iPod-dan əvvəl MP3 pleyerlərin olduğunu, lakin Apple-ın bu sahələrin hər birində standartı qaldırdığını xatırladıb. Bu yanaşmanın süni zəkaya da aid olacağını bildirib.

Apple-ın proqram təminatı üzrə baş direktoru Krek Federiqi də görüşdə çıxış edərək, xüsusilə yeni Siri versiyasındakı gecikmələr barədə ətraflı məlumat verib. Federiqi, ilkin planlarının Siri üçün hibrid arxitekturası tətbiq etmək olduğunu, yəni ənənəvi Siri tapşırıqlarının ayrı bir sistemdə, böyük dil modeli (LLM) əsaslı tapşırıqların isə ayrıca bir infrastrukturda işləməsini planlaşdırdıqlarını izah edib. Lakin bu yanaşmanın istənilən keyfiyyətə nail ola bilməyəcəyini başa düşərək, mövcud arxitekturadan tamamilə imtina edib və sistemi tamamilə yenidən qurublar.

Rəqib şirkətlərin bu sahədə aqressiv addımlarından sonra süni zəka sahəsində Apple-ın uzun müddətli susqunluğu tənqidlərə səbəb olmuşdu. Siri-nin inkişafı bu tənqidlərin əsas mərkəzinə çevrilmişdi. Federiqinin bəyanatları Apple-ın süni zəka strategiyasında daha radikal və dərin bir transformasiyaya başladığını göstərir. Şirkətin son dövrlərdə süni zəkaya yönəlmiş işəgötürmə, satın almalar və proqram yeniləmələrindəki artım, Apple-ın bu sahədə rəqabəti sadəcə müşahidə etməyəcəyini təsdiqləyir. Tim Kuk-un əməkdaşlarına ünvanladığı aydın mesaj isə bu yanaşmanın daxili motivasiya ilə dəstəkləndiyini təsdiqləyir.