CMF Telefonunun Partlaması Nəticəsində Ölüm

Hindistanın yollarında faciəli bir hadisə baş verib. Motosiklet sürücüsünün cibindəki CMF Phone 1 modeli birdən-birə partlayıb. Partlayış nəticəsində sürücü nəzarəti itirib və qəza edib. Təəssüf ki, sürücü həyatını itirib, yanındakı sərnişin isə ağır yaralanıb.

Hadisə ilə bağlı ilkin araşdırmalar göstərir ki, təxminən bir ay əvvəl alınmış telefonun batareyasında problem yaşanıb. Partlayışın dəqiq səbəbi hələlik müəyyən olunmayıb, ancaq batareyanın qüsurlu olması ehtimalı güclüdür. Bu, CMF Phone 1 modelinin ilk partlama hadisəsi olsa da, smartfon batareyalarının partlaması nadir deyil. Əvvəllər də müxtəlif Çin markalı telefonlarda oxşar hadisələr baş verib. Xatırladaq ki, CMF, Nothing şirkətinin alt brendidir.

Hadisə ilə bağlı Nothing şirkətinin rəsmi açıqlaması hələlik yoxdur. Ekspertlər istifadəçiləri telefonların həddindən artıq isinməsi və ya batareyanın şişməsi kimi əlamətlərə diqqətli olmağa, cihazların proqram təminatını yeniləməyə və yalnız sertifikatlı şarj cihazlarından istifadə etməyə çağırırlar.