Egey dənizində güclü zəlzələ təhlükəsi: Türkiyəni təhdid edirmi?

Son həftə Egey dənizində 400-dən çox zəlzələ baş verib. Xüsusilə Santorini və Amorgos adaları ətrafında 28 yanvardan etibarən seysmik fəallıq artıb. 1.3 ilə 4.8 bal arasında dəyişən zəlzələlər, bölgə əhalisini ciddi narahat edib. Yunanıstan hökuməti bəzi adalarda məktəbləri bağlayaraq fövqəladə vəziyyət elan edib. Santorini və Amorgos da daxil olmaqla dörd adada əhaliyə sahil kənarlarından uzaq durmağı və izdihamlı yerlərdən çəkinməyi tövsiyə ediblər. Baş nazir Kyriakos Mitsotakis rəhbərliyində hökumət mümkün güclü zəlzələyə qarşı tədbirləri müzakirə etmək üçün təcili iclas keçirib.

Seysmik fəallıq Türkiyə sahillərində də hiss olunub. Bodrumdan 140 kilometr məsafədə baş verən zəlzələlər Muğla və Aydın əhalisi tərəfindən qeydə alınıb. Mütəxəssislər bölgədəki fəallığın böyük bir zəlzələyə səbəb olub-olmayacağını qiymətləndirib və 7 baldan yuxarı zəlzələnin sunamiyə və Türkiyə sahillərinə dağıdıcı təsir göstərə biləcəyi barədə xəbərdarlıq ediblər. Professor Doktor Naci Görür, Kipr fay xəttinin əvvəllər 8 bal gücündə zəlzələlər yaratdığını xatırladaraq yerli hakimiyyətləri həyəcan tədbirləri görməyə çağırıb. Egey sahillərində sunami riskinin olduğunu bildirən Görür, "7 baldan yuxarı zəlzələ sahil bölgələrinə ciddi ziyan vura bilər" deyib. Yunanıstanda insanların qorxu içərisində adalardan köçməyə başladığı bildirilir. Böyük Britaniya vətəndaşlarını Yunan adalarına səyahət etməməyə çağırıb. Bundan əlavə, Santorini yaxınlığındakı Kolumbo sualtı vulkanı bölgədəki narahatlığı artırır. Alimlər bölgədəki seysmik fəallığın tektonik mənşəli olduğunu bildirirlər, lakin vulkanik fəaliyyət də izlənilir. Hakimiyyət orqanları əhalini sahil kənarlarından uzaq durmağa və tərk edilmiş binalara yaxınlaşmamağa çağırır. Egey dənizindəki bu seysmik fəallıq azalacaqmı, yoxsa daha güclü zəlzələ olacaqmı? Gələn günlərdəki inkişaflar bölgədəki riski daha aydın şəkildə ortaya qoyacaq.