Google Cloud və Turkcell-dən Türkiyədə 1 Milyard Dollarlıq Süni İntellekt Mərkəzi Layihəsi

Google Cloud və Turkcell Türkiyənin rəqəmsal gələcəyini dəyişdirmək məqsədilə genişmiqyaslı strateji əməkdaşlıq müqaviləsi imzaladılar. Bu tərəfdaşlıq çərçivəsində, Turkcell-in iştirakı ilə Türkiyədə yeni Google Cloud bulud regionu yaradılacaq. Turkcell bu layihə daxilində məlumat mərkəzlərinə və bulud texnologiyalarına 1 milyard dollar investisiya etməyi planlayır. Bu böyük sərmayə, ölkənin rəqəmsal infrastrukturunu dünya səviyyəsinə qaldırmaq və Turkcell-in məlumat mərkəzi sektorunda liderliyini gücləndirmək üçün atılır. Layihənin əsas hədəfi isə şirkətlərin rəqəmsal dəyişimini sürətləndirmək və Süni İntellekt (Sİ) yönümlü yeniliklərə yol açmaqdır.

Yeni bulud regionunun istifadəyə verilməsi ilə Google Cloud-un yüksək performanslı və aşağı gecikmə müddətli xidmətləri Türkiyədə geniş şəkildə əlçatan olacaq. Müəssisələr verilənlərin analitikası, kiber təhlükəsizlik və rəqəmsal biznes həlləri kimi qabaqcıl Google xidmətlərindən istifadə edə biləcəklər. Bu, hər ölçüdə olan şirkətlərə, startaplara və dövlət qurumlarına daha səmərəli işləmək, sürətlə böyümək və texnoloji üstünlükləri istifadə etmək imkanı yaradacaq. Eyni zamanda, Türkiyənin rəqəmsal ekosistemi də güclənəcək. Google Cloud Regionunun qurulması üzrə əməkdaşlıqla yanaşı, Turkcell bu regionda təqdim ediləcək xidmətlərin marketinqi və satışına da cavabdeh olacaq. Bu, Turkcell-in Türkiyəni regional rəqəmsal yenilik mərkəzinə çevirmək vizyonunu dəstəkləyir.

Türkiyə Cumhurbaşkanı Köməkçisi Cevdet Yılmaz razılaşma ilə bağlı açıqlamasında bu tərəfdaşlığın ölkənin rəqəmsal dəyişim səyahətini sürətləndirəcəyini söyləyib. O, bu müqavilənin qlobal texnologiya nəhənglərinin Türkiyə iqtisadiyyatının möhkəmliyinə və yenilik qabiliyyətinə olan inamını göstərdiyini vurğuladı. Yılmaz qeyd edib ki, bu addım qabaqcıl məlumat infrastrukturu və yeni nəsil bulud texnologiyalarını rəqəmsal ekosistemə inteqrasiya edərək həm dövlət, həm də özəl sektorda səmərəliliyi artıracaq. Turkcell-in baş direktoru Dr. Ali Taha Koç da bu tərəfdaşlığı Türkiyənin rəqəmsal gələcəyi üçün tarixi bir mərhələ adlandırıb və Google Cloud-un qlobal texnologiyaları ilə Turkcell-in vizyonunu birləşdirərək Sİ-yə fokuslanan yeniliklərə zəmin hazırladığını bildirib.

Google Cloud-un baş direktoru Thomas Kurian bu əməkdaşlığı Türkiyə iqtisadiyyatının gələcəyinə edilən strateji bir sərmayə hesab edir. O, Türkiyədə bulud və süni intellekt sahəsində artan tələbatı qarşılamağı hədəflədiklərini, əməkdaşlığın rəqəmsal dəyişimi sürətləndirəcəyini və yeni nəsil şirkətlərin yaranmasına kömək edəcəyini söyləyib. Qlobal araşdırma şirkəti IDC-nin proqnozlarına görə, Türkiyənin bulud bazarı 2024-cü ildəki 1.7 milyard dollardan 2029-cu ildə 4.2 milyard dollara çatacaq. İllik mürəkkəb artım tempinin 20% olacağı gözlənilir. Türkiyədə hiperskal bulud regionunun qurulması bu böyümənin əsas təkanverici qüvvəsi kimi xidmət edəcək və ölkənin qlobal rəqəmsal iqtisadiyyatda mövqeyini gücləndirəcək.