Google Tensor G6: 2 nanometr texnologiya ilə istehsal olunacaq!

Google, Pixel telefonları üçün hazırladığı Tensor prosessorlarının istehsalçısını dəyişərək strategiyasında əhəmiyyətli bir dönüş yaratdı. Şirkət Samsung Foundry ilə əməkdaşlığını bir müddət dayandırdı və çip istehsalını TSMC-yə keçirdi. Bu dəyişikliklə Google Tensor G6, 2 nanometr texnologiya ilə istehsal olunacaq.

Qeyd edək ki, Pixel 10 seriyası TSMC-nin 3 nanometr N3E prosesi ilə istehsal olunan Tensor G5 çipseti ilə satışa çıxarılacaq. Lakin ən diqqət çəkən yenilik, gələn il satışa çıxarılacaq Pixel 11 modellərində istifadə olunacaq Tensor G6 prosessoru ilə bağlıdır. Google bu yeni nəsil prosessoru TSMC-nin ən müasir istehsal texnologiyası olan 2 nanometr prosesi ilə istehsal etməyi planlaşdırır.

Google rəhbərlərinin ötən ay Tayvanda TSMC rəsmiləri ilə keçirdiyi görüşlər göstərir ki, bu plan qısamüddətli bir istehsal dəyişikliyi ilə məhdudlaşmır. Şirkətin gələn üç-beş il ərzində TSMC ilə əməkdaşlığını dərinləşdirməyi hədəflədiyi bildirilir. Tensor G6-nın 2 nanometr texnologiyası ilə istehsalı; Google-un Apple, Qualcomm və MediaTek kimi rəqibləri ilə texnoloji cəhətdən ayaqlaşmaq üçün əvvəlki nəsil istehsal texnologiyalarını atlaması deməkdir.

TSMC, 2 nanometr istehsal xəttini 1 aprel tarixindən etibarən sifarişlər üçün açdı, lakin bu texnologiyadan hansı şirkətlərin istifadə edəcəyi barədə rəsmi açıqlama verilməyib. Buna baxmayaraq, texnologiya dairələrində Apple-ın A20 çipsetini bu prosesdə istehsal edəcəyi artıq ümumi qəbul olunmuş bir fikirdir. Bu vəziyyət Google-un oxşar strateji istiqamətə girdiyini göstərir.

Tensor G6-nın 2 nanometr texnologiya ilə istehsalı performans və enerji səmərəliliyi baxımından əhəmiyyətli qazanc təmin edə bilər. Yeni istehsal texnologiyalarının üstünlükləri ilə yanaşı, dəyər tərəfi də diqqət çəkir. 2 nanometr prosesinin əvvəlki nəsillərdən daha baha olduğu bildirilir. Bu amil, xüsusilə də hardware tərəfində məhdud həcmdə işləyən Google kimi bir şirkət üçün ciddi büdcə planlaşdırması tələb edə bilər. İstehsal xərclərindəki artım cihaz qiymətlərinə də dolayı yolla təsir göstərə bilər.