"GTA VI" hazırlayan Rokstar Qeyms kütləvi ixtisarlara görə ittiham olunur: Həmkarlar ittifaqını dağıtmaq cəhdi

“Grand Theft Auto VI” videooyununun hazırlanması ilə məşğul olan Rokstar Qeyms (Rockstar Games) studiyası kütləvi işdən çıxarılmalar səbəbindən ciddi tənqidlərə məruz qalıb. Bildirilir ki, şirkət keçən həftə ərzində təxminən 30 ilə 40 nəfər arasında işçini vəzifəsindən azad edib. Bu ixtisarlar studiyanın həmkarlar ittifaqı ilə bağlı apardığı siyasətə görə ittiham olunmasına səbəb olub.

Böyük Britaniyanın Müstəqil İşçilər Həmkarlar İttifaqı (IWGB) bu hadisəyə kəskin reaksiya verib. Həmkarlar İttifaqının açıqlamasına görə, vəzifəsindən azad edilən işçilərin hamısı xüsusi bir "Discord" qrupunda birləşmişdilər və aktiv təşkilatlanma fəaliyyəti ilə məşğul idilər. IWGB iddia edir ki, çıxarılan heyət ya artıq həmkarlar ittifaqının üzvləri idi, ya da Rokstar studiyasında təşkilatlanma işləri aparmağa cəhd edirdilər.

Təşkilatın fikrincə, bu kütləvi ixtisarlar Rokstarın işçilərin qanuni birləşmə və kollektiv müqavilə bağlamaq hüquqlarına qarşı yönəlmiş bir addımdır. Bu vəziyyət, böyük texnologiya və videooyun şirkətlərində işçilərin hüquqlarının müdafiəsi məsələsinin nə qədər həssas olduğunu bir daha göstərir.