Intel Avtomobil Bölməsini Bağladı: Səbəb Nədir?

Yarıkeçirici sektorunun nəhənglərindən biri olan Intel, 2021-ci ildə başladığı avtomobil çip istehsalı fəaliyyətinə son qoyma qərarı verdi. Çərşənbə günü əməkdaşlarına göndərilən daxili məktubda şirkət mövcud istehsalçı və təchizatçı müqavilələrinə əməl edəcəyini, lakin daxili avtomobil platformasının tamamilə bağlanacağını açıqladı.

Avtomobil bölməsi şirkətin ümumi gəlirlərinin böyük bir hissəsini təşkil etməsə də, Intel imzalı çiplər dünyada 50 milyondan çox avtomobilin tərkibində istifadə olunur. Bu çiplər infotainment sistemləri, elektrikli avtomobillərin enerji idarəetməsi və qabaqcıl sürücü köməkçi sistemləri kimi müxtəlif sahələrdə tətbiq olunur. Buna baxmayaraq, bölmənin ümumi portfeldəki çəkisi məhdud qalıb.

Şirkətin yeni idarəetmə strategiyası diqqəti əsas biznes xətlərinə yönəltməyi hədəfləyir. Bu kontekstdə, müştəri prosessorları və məlumat mərkəzi həlləri kimi əsas sahələrə daha çox resurs ayrılacaq. Intel, bu transformasiya prosesi zamanı istehsal heyətinin 20 faizinə qədərini əhatə edə biləcək yeni bir işçi ixtisar dalğasına hazırlaşır.

Marketinq şöbəsi də yenidən qurulma prosesindən təsirlənəcək. Intel bu sahədəki fəaliyyətinin çoxunu Accenture konsaltinq şirkətinə ötürür. Şirkət sonradan marketinq əməliyyatlarında süni intellekt əsaslı sistemlərin tətbiqini planlaşdırır. Baş icraçı direktor Lip-Bu Tan vəzifəyə başladığı gündən “əsas sahələrə diqqət” retoriasını davam etdirir. Avtomobil şöbəsinin bağlanması bu yanaşmanın ən konkret nümunəsi kimi diqqət çəkdi.