iPhone 18 peyk əsaslı 5G bağlantısı ilə gəlir: Tim Kuk İlon Maskın bir vaxtlar rədd etdiyi təklifə "Hə" deyə bilər

Apple şirkəti yeni iPhone 18 seriyası ilə peyk rabitə texnologiyasında böyük irəliləyiş əldə edir. Şirkətə yaxın mənbələrin məlumatına görə, Apple növbəti nəsil iPhone modellərində aparat təminatında (hardware) dəyişikliklər edərək peyk əsaslı 5G bağlantısını dəstəkləyəcək. Bu mühüm inkişaf gələcəkdə Apple-ın internet bağlantısı üçün İlon Maskın SpaceX-ə məxsus "Starlink" şəbəkəsi ilə əməkdaşlıq etməsinə geniş şərait yaradır.

Apple peyk bağlantısı vasitəsilə Təcili SOS funksiyasını ilk dəfə iPhone 14 seriyası ilə təqdim etmişdi. Bu funksiya istifadəçilərə mobil siqnalın olmadığı ərazilərdə təcili yardım xidmətləri ilə əlaqə qurmağa və yerlərini paylaşmağa imkan verirdi. Lakin "iPhone 18" seriyası bu bağlantı texnologiyasını tamamilə yeni səviyyəyə qaldırır. "The Information" nəşrinin hesabatına görə, Apple gələn ildən etibarən yerüstü şəbəkələrdən asılı olmayan 5G şəbəkələrini dəstəkləyən iPhone modelləri hazırlamağı planlaşdırır. Bu məlumat onu göstərir ki, iPhone 18 yalnız fövqəladə hallarda deyil, həm də yüksək sürətli məlumat ötürülməsini peyk vasitəsilə təmin edən ilk cihazlardan biri ola bilər.

Hazırda Apple peyk rabitəsi sahəsində "Globalstar" şirkəti ilə əməkdaşlıq edir. Ancaq yeni məlumatlar "Globalstar"ın sədri Ceyms Monroya 10 milyard dollara şirkəti satmağı planlaşdırdığını ortaya qoyur. Bu vəziyyət Apple və "Globalstar"ın yaxın zamanda müstəqil fəaliyyətə hazırlaşdığını deməyə əsas verir. Bu hadisələrlə yanaşı, SpaceX-in yeni "Starlink" peykləri Apple-ın hazırda mövcud peyk bağlantısı üçün istifadə etdiyi eyni tezlik spektrini dəstəkləyir. Texniki cəhətdən olan bu uyğunluq iki nəhəng şirkət arasında potensial tərəfdaşlığın reallaşması ehtimalını daha da artırır.

Qeyd edək ki, 2022-ci ildə İlon Mask Apple şirkətinə 5 milyard dollarlıq bir əməkdaşlıq təklifi etmişdi, lakin Tim Kuk o zaman bu təklifi qəbul etməmişdi. İndi iPhone 18 seriyasında peyk əsaslı 5G-yə keçid, o vaxt Kuk tərəfindən rədd edilən təklifin bu gün nəhayət ki, gerçəkləşə biləcəyi ehtimalını gücləndirir.