Kaltura "Snap"ın Süni Zəka (AI) Qurucusu tərəfindən Yaradılan eSelf Şirkətini 27 Milyon Dollara Alır

Nyu York mərkəzli Süni Zəka (AI) video platforması şirkəti olan Kaltura, İsraildə yerləşən "eSelf.ai" startapını təxminən 27 milyon dollara satınalır. eSelf istifadəçilərlə danışa bilən, süni zəka tərəfindən yaradılmış rəqəmsal insanları – yəni söhbətedici avatarları yaradır. Kaltura bu gün fotorealistik rəqəmsal avatarların hazırlanması, fərdiləşdirilməsi və tətbiqi üçün studiyaya malik, 30-dan çox dili dəstəkləyən eSelf-i almaq barədə yekun müqavilə imzaladığını elan etdi. Bu addım Kaltura-nın video xidmətlərini insanabənzər interfeyslərlə birləşdirərək öz mövqeyini gücləndirmək üçün atdığı çox böyük strateji addımdır.

eSelf 2023-cü ildə baş icraçı direktor (CEO) Alan Bekker və texniki direktor (CTO) Eylon Şoşan tərəfindən qurulub. Qeyd edək ki, Alan Bekker 2020-ci ildə ilk startapı olan Voca-nı "Snap" şirkətinə satmışdı. eSelf platforması nitqdən videoya generasiya, aşağı gecikməli nitqin tanınması və ekranı anlama texnologiyası sahələrində dərin biliklərə malikdir. Bu imkanlar avatarlara istifadəçinin ekranında nə olduğunu görməyə və buna uyğun cavab verməyə imkan verir. Kaltura-nın həmtəsisçisi və CEO-su Ron Yekutiel, iki yaşı olan bu startapda 15 AI mütəxəssisindən ibarət güclü komanda olduğunu bildirib. O, Bekkerin danışıq nitq botları sahəsində ekspert olduğunu vurğulayaraq, Kalturanın məhz bu təcrübəni əldə etdiyini qeyd edib. Satınalmadan sonra eSelf-in qurucuları və bütün hazırkı işçiləri eSelf texnologiyasını şirkətə inteqrasiya etməyə nəzarət etmək üçün Kaltura-ya qatılacaqlar.

Nasdaq-da listələnən Kaltura, geniş korporativ video portallarından tutmuş vebinarlar və virtual tədbirlər üçün alətlərə qədər bulud əsaslı proqram həlləri təklif edir. O, həmçinin universitetlərin təhsil idarəetmə sistemlərinə video təlimləri daxil edən inteqrasiya vasitələri də təmin edir. Kaltura video platforması 800-dən çox müəssisə müştərisinə, o cümlədən Amazon, Oracle, Salesforce, SAP, Adobe və IBM kimi texnologiya nəhənglərə, eləcə də aparıcı banklara, sığorta şirkətlərinə və ABŞ universitetlərinə xidmət göstərir. Şirkət eSelf.ai-nin virtual agent texnologiyasını öz video təkliflərinə daxil etməyi planlaşdırır. Bu inteqrasiya sayəsində agentlər real vaxt rejimində dinləyə, danışa və istifadəçinin ekranını şərh edə biləcək. Yekutiel müsahibəsində bildirib ki, eSelf real vaxtlı, sinxron söhbət üçün bu sahənin ən yaxşısı idi, həm texnologiya, həm də mədəni baxımdan Kaltura ilə uyğunluq əsas idi.

Kaltura CEO-su qeyd edir ki, şirkət sadəcə video platformasından video əsaslı müştəri və işçi təcrübəsi təminatçısına çevrilir. AI-nin inkişafı sayəsində videolar indi anında, yüksək dərəcədə fərdiləşdirilmiş şəkildə yaradıla bilir. Kaltura tək bir "üz" təklif edən avatarlar yaratmaq yerinə, tam iş axını – avatar, zəka və müəssisə məlumat bazasına qoşulmuş bilikləri təmin edir. Şirkət e-ticarət, səhiyyə, təhsil və maliyyə xidmətləri kimi sektorlar üçün satış, marketinq, dəstək və təlim məqsədləri üçün istifadə edilə bilən müstəqil agentləri təqdim etməyi planlaşdırır. Bu, Kaltura-nın Tvinci (2014), Rapt Media (2018) və Newrow (2020) satınalmalarından sonra dördüncü belə addımıdır. 2021-ci ildə ictimaiyyətə açılan Kaltura, təxminən 180 milyon dollar gəlir əldə edir və düzəldilmiş EBITDA və pul axını baxımından mənfəətlidir, təxminən 600 işçisi var.