Mastodon Kökündən Dəyişir: Təsisçi Rəhbərlikdən Ayrılır və Şəbəkə Qeyri-Kommersiya Quruluşuna Keçir

Mərkəzləşdirilməmiş, açıq mənbəli sosial şəbəkə və "X" platformasının rəqibi olan “Mastodon”un yaradıcısı Eugen Rochko Baş İcraçı Direktor (CEO) vəzifəsindən istefa verir. Bu qərar, təşkilatın ilin əvvəlində elan edilmiş qeyri-kommersiya təşkilatı strukturuna keçid planının tərkib hissəsidir. Bu addım “Mastodon”un indiyə qədər həyata keçirdiyi ən əhəmiyyətli rəhbərlik dəyişikliyi hesab olunur və şəbəkənin uzunmüddətli fəaliyyətini təmin etməyə yönəlib. Yenidənqurma sayəsində “Mastodon” öz fəaliyyətini, məhsullarını və əsas missiyasını artıq tək bir şəxsin idarəçiliyindən asılı olmadan genişləndirmək imkanı əldə edir.

Təşkilatın restrukturizasiya planına uyğun olaraq, “Mastodon” Direktorlar Şurası tərəfindən idarə olunacaq. Hazırda Şuranın üzvləri arasında “Twitter”in qurucularından olan Biz Stoun, Karien Bezuidenhout, Esra’a Əl Şafei və İcraçı Direktor vəzifəsini tutacaq Feliks Hlatki yer alır. Yeni rəhbərlik komandasına Texniki Direktor kimi Renu Çapu, Kommunikasiya Rəhbəri kimi Endi Payper və Strategiya və Məhsul Məsləhətçisi kimi Filip Şröpel daxildir. Ümumilikdə, “Mastodon”un 10 nəfər tam ştatlı əməkdaşı var. Rochko on il ərzində bütün diqqətini bu layihəyə yönəltdiyini nəzərə alaraq, istefasının həm də özünə fasilə vermək məqsədi daşıdığını bildirir. O, gələcəkdə platformaya məsləhətçi kimi dəstək olmağa davam edəcək. Əlavə olaraq, Rochko “Mastodon”u qurarkən illər boyu bazar qiymətindən az maaş aldığı üçün ona birdəfəlik 1 milyon avro ödəniş edilib.

Rochko bildirib ki, “Mastodon” tək idarə edə bilməyəcəyi qədər böyüdüyünü anladıqda kənara çəkilməyin vaxtının gəldiyini bilirdi. Bu qərarın verilməsində iş yorğunluğu da əsas amillərdən biri olub. O, “Mastodon”un onun şəxsi kimliyi ilə demək olar ki, sinonimləşdiyini və sosial media haqqında gördüyü hər şeyin birbaşa öz işinə təsir etməsindən böyük stress yaşadığını izah edir. Bu stress sonda tükənməyə səbəb olub. O, vəzifədən ayrılmağın və məsuliyyətin digər insanlarla paylaşılmasının həyatında tarazlığı bərpa etməyə imkan verəcəyini qeyd edib. Rochko, həm də digərlərinə bacardıqları halda eyni şeyi etməyi tövsiyə edərək, bütün vaxtı işə sərf etməyin sağlam olmadığını vurğulayıb. Bu fəlsəfə, Silikon Vadisində süni intellekt dövründə bəzi qurucuların Çinin intensiv "996" iş qrafiki kimi amansız iş mədəniyyətini mənimsədiyi yayılmış yanaşmaya ziddir.

Yeni İcraçı Direktor Hlatkinin sözlərinə görə, qeyri-kommersiya təşkilatına çevrilmə xüsusilə Avropada yeni maliyyə imkanlarının açılmasına kömək edəcək. Təşkilat ABŞ-da qeyri-kommersiya statusunu təmin etsə də, ötən il Almaniyadakı qeyri-kommersiya statusunu itirmiş alman qurumunu əvəz etmək üçün Belçikada da oxşar status (AISBL) almaq üzərində işləyir. Bu prosesə dəstək olmaq üçün “Mastodon” bir neçə mühüm mənbədən vəsait toplayıb. Bunlara “Stack Exchange”in qurucusu Ceff Etvud və ailəsi (2,2 milyon avro), Biz Stoun, alternativ tətbiq bazarı “AltStore” (260 min avro), “Global Chinese Community of Universal Digital Commons” (65 min avro) və “Craigslist”in qurucusu Kreyq Nyumark daxildir. Hlatki texnologiya sahəsində biznes və maliyyə təcrübəsinə malikdir və bu keçiddən əvvəl “Mastodon”a təmənnasız məsləhətlər verib. Yeni vəzifəsində Hlatki platformanı daha maddi dayanıqlı etmək üçün yeni layihələrə, o cümlədən hosting və moderasiya xidmətləri biznesinə nəzarət edəcək. Rochko isə “Mastodon”un yenidənqurma nəticəsində "milyarderlərə qarşı davamlı" sosial media mövqeyini qoruyacağına inanır. O, Bluesky kimi digər mərkəzləşdirilməmiş şəbəkələrə inteqrasiyanı kənar layihələrə buraxaraq, əsas diqqəti öz daxili infrastrukturuna yönəldəcəklərini bildirib. Rochkonun fikrincə, Threads, İnstaqram və “X” daxil olmaqla, böyük platformaların hamısının həddən artıq zəngin şəxslərə aid olması və onların bu platformalardan ictimai söhbətlərə təsir etmək üçün getdikcə daha çox istifadə etməsi narahatlıq doğurur. Buna görə də, o, “Mastodon”un bu cür nəzarətdən azad olan yeganə platformalardan biri olduğunu vurğulayır.