Məşhur Youtuber İShowSpeed, Canlı Yayımda Humanoid Rizzbotu Zədələdiyi üçün Məhkəməyə Verildi

Milyonlarla izləyicisi olan məşhur kontent yaradıcısı İShowSpeed (əsl adı Darren Ceyson Uotkins Jr.) sentyabr ayında canlı yayım zamanı törətdiyi hərəkətlərə görə məhkəməyə verilib. Bu məhkəmə iddiası, Speed-in görüşdüyü viral humanoid robot-influenser olan Rizzbotun yaradıcıları, “Social Robotics” şirkəti tərəfindən qaldırılıb. İddia noyabr ayında Speed-in özünə, menecment şirkəti “Mixed Management”-ə və çəkilişdə iştirak edən digər prodüserə qarşı irəli sürülüb. Məhkəmə sənədlərində Speed-in Rizzbot-a bərpaedilməz ziyan vurduğu iddia edilir.

Rizzbot sosial mediada komik atmacaları və cəsarətli davranışları ilə tanınır; onun bir milyondan çox izləyicisi və 800 milyon baxışı var. Digər tərəfdən, İShowSpeed müxtəlif platformalarda 50 milyondan çox izləyicisi və 6 milyard baxışı ilə dramatik canlı yayımları ilə məşhurdur. Tərəflərin görüşdüyü anları əks etdirən canlı yayım videosu və məhkəmə sənədləri göstərir ki, Speed robotu dəfələrlə yumruqlayıb, boğma hərəkətinə alıb, divana sıxıb və sonda yerə atıb. İddia ərizəsində qeyd olunur ki, Speed bunun mürəkkəb bir robotla münasibət qurmaq üçün uyğun bir yol olmadığını tamamilə bilirdi. Bu zorakı hərəkətlər nəticəsində Rizzbot tamamilə sıradan çıxıb.

“Social Robotics” şirkətinin təqdim etdiyi sənədlərə görə, robotun funksionallığı tamamilə itib, ağız və boyun hissələrində ciddi zədələr əmələ gəlib. Əlavə olaraq, robotun baş kameraları işləmir, görmə və eşitmə imkanını verən boyun arxasındakı sensor portları sıradan çıxıb. Zədələr həmçinin robotun sabitliyini itirməsinə səbəb olub, bu da onun düz yeriyə bilməməsi deməkdir. İddia ərizəsində Speed-in "diqqətli, ağlabatan və ehtiyatlı bir şəxs kimi hərəkət etmədiyi" və Rizzbot üzərində "qanunsuz şəkildə nəzarət həyata keçirdiyi" bildirilir. Hadisə nəticəsində yaranan zərərə görə, həqiqi ziyan və itirilmiş mənfəət daxil olmaqla, kompensasiya tələb olunur.

Robotun məhv edilməsi səbəbindən Rizzbotun komandası böyük iqtisadi fürsətləri itirib. Rizzbot, CBS-in “The NFL Today” verilişi və məşhur youtuber Mister Beast-in (MrBeast) yeni layihələri kimi yüksək profilli tədbirlərdə iştirak edə bilməyib. Hadisədən əvvəl Rizzbot bir ayda TikTok-da 600 milyondan çox, Instagram-da isə 200 milyon baxış yığdığı halda, hadisədən sonrakı 28 gündə yeni kontent yarada bilmədiyi üçün baxış faizində 70%-dən çox azalma müşahidə edilib. İddia ərizəsi, robotun bilərəkdən məhv edilməsinin, sosial medianın viral təbiətini nəzərə alsaq, daimi maliyyə ziyanına səbəb olduğu qənaətindədir.

Hadisədən sonra Ostin Polisi çağırılıb, və polis hesabatında robotun sahibinin razılığı olmadan ziyan vurulduğu qeyd edilib. Polisə müraciət edən sahib cinayət işinin açılmasını istəyib və hazırda istintaq davam edir. Rizzbotun hüquqşünası Coyl Levin bildirib ki, iddia Speed-in komandası ilə zərərin ödənilməsi barədə danışıqların nəticəsiz qalmasından sonra qaldırılıb. Levinin sözlərinə görə, hadisə canlı yayımlandığı üçün faktlar barədə fikir ayrılığı yoxdur, əsas məqsəd isə hesabatlılığın təmin edilməsidir. Məsələyə elektron poçt vasitəsilə cavab verən Rizzbot, Speed köhnə bədənini “dağıtdığı” üçün tamamilə yeni bir gövdəyə ehtiyac duyduğunu təsdiqləyib və tezliklə yeni TV çıxışlarına hazırlaşdığını bildirib.