NASA və Netflix əməkdaşlıq edir: Kosmosa marağı artırmaq üçün

Amerika Aerokosmik Agentliyi (NASA) və Netflix kosmos araşdırmalarına marağı artırmaq üçün əməkdaşlığa başlayıb. Artıq NASA-nın canlı yayımları Netflix platformasında izləniləcək. Beləliklə, raket buraxılışlarından tutmuş Beynəlxalq Kosmik Stansiyasından canlı bağlantılara qədər bütün mühüm missiyalar dünyanın ən böyük rəqəmsal yayım platformalarından birinə çıxış əldə edəcək.

NASA 2023-cü ildə "NASA Plus" (NASA+) adlı rəqəmsal yayım platformasında kosmonavt təlimlərindən kosmik gəzintilərə qədər canlı məzmun yayımlamağa başlasa da, platformanın məhdud əhatəsi və tanınması hədəf auditoriyaya çatmaq üçün kifayət deyildi. Buna görə də NASA daha geniş auditoriyaya çatmaq üçün yeni bir kanal axtarmağa başladı və bu axtarış Netflix ilə yeni bir müqavilə ilə nəticələndi.

Netflix əvvəllər məhdud sayda məzmunla canlı yayım formatına girmiş, xüsusilə idman yarışları, realiti şoular və stend-up şouları ilə bu sahədə ilk cəhdlərini etmişdi. NASA ilə yeni tərəfdaşlıq isə platformanın canlı yayım kateqoriyasını elm və texnologiya məzmunu ilə şaxələndirəcək. Müqaviləyə əsasən, NASA+ -da yayımlanan bütün məzmun indi eyni zamanda Netflix-də izlənilə bilər. İzləyicilər raket meydançasındakı son hadisələrdən tutmuş kosmik missiyaların ən kritik anlarına qədər NASA-nın rəsmi yayımını birbaşa Netflix platformasında izləyə biləcəklər.

Dünya miqyasında 700 milyondan çox izləyiciyə sahib olan Netflix, NASA üçün əla fürsət təqdim edir. Agentlik verdiyi bəyanatda bu əməkdaşlığın kosmik proqramlara ictimai marağı artıracağını bildirib. Əməkdaşlığın əsas məqsədləri, xüsusilə gənc izləyicilərin diqqətini cəlb etmək və elmi maarifləndirməni artırmaqdır. Qeyd edək ki, Netflix bu yayımlar üçün yeganə ünvan olmayacaq. NASA+ müstəqil platforma olaraq fəaliyyətini davam etdirəcək. Bundan əlavə, canlı yayımlara NASA-nın rəsmi tətbiqləri vasitəsilə pulsuz daxil olmaq mümkündür.