Opera GX strimerlərin canlı yayımlarını "Yayım Profili" ilə təhlükəsiz edir

“Opera GX” brauzeri canlı yayım edən kontent yaradıcılarının ən böyük narahatlıqlarını nəzərə alaraq yeni bir alət - “Opera GX Yayım Profili”ni hazırlayıb. Bu xüsusi rejim yayımçıların təsadüfən şəxsi məlumatlarını, həssas detalları və ya diqqəti yayındıran elementləri tamaşaçılara göstərməsinin qarşısını alır. Bu xüsusiyyət məhz canlı efirlərin bütövlüyünü və peşəkarlığını saxlamaq üçün yaradılıb, strimerlərə rahatlıqla işləmək imkanı verir.

Bəs "Opera GX Yayım Profili" necə işləyir? Bu alət yayımçılara auditoriyanın nə gördüyü üzərində tam nəzarət imkanı təklif edir. O, səhifə tarixçənizi və son axtarışlarınızı ünvan çubuğundan gizlədir, beləcə, baxış vərdişləriniz tam təhlükəsiz qalır. Ana səhifədəki tarixçəyə əsaslanan sayt tövsiyələri də sistemdən silinir. Əlavə olaraq, onlayn alış-veriş saytlarından son baxılan məhsullar da gizlədilir, bununla da hədiyyə siyahınızın təsadüfən ifşası önlənir. Təmiz və səliqəli bir görünüş əldə etmək üçün bütün vidjetlər və sürətli giriş qısayolları bu rejimdə söndürülür.

Yeni profil avtomatik olaraq bütün açıq vərəqələri səssizə alır və brauzerin bütün səslərini boğur. Bu sayədə kənar bildiriş səslərinin və ya multimedia səslərinin yayına mane olması mümkünsüz olur. Brauzerin daxili reklam bloklayıcısı açılan pəncərələri (pop-upları) bloklayır. Daha bir mühüm addım kimi, şəxsi söhbətlərin görülməsinin qarşısını almaq üçün sosial media və mesajlaşma proqramları yan paneldən gizlədilir. İstifadə rahatlığı üçün GX bu profilə keçid üçün ayrıca bir iş masası qısayolu yaradır. Bu, strimerlərə tək kliklə yayım rejiminə keçməyə imkan verir. Eyni zamanda, bu rejimdə hardware sürətləndirilməsini söndürmək də mümkündür, bu da bəzi ekran tutma alətləri ilə uyğunluğu daha yaxşı edir.

Bu yeni funksiyanın təqdimatını gücləndirmək üçün "Opera GX" "Streamlabs" platforması ilə tərəfdaşlıq edib. GX istifadəçiləri "Streamlabs Ultra" abunəliklərinə aylıq 12 dollar və ya illik 39 dollar endirim əldə etmək imkanı qazanırlar. Bu funksiyadan istifadə etmək üçün brauzerin loqosuna klikləmək və menyudan "Profillər" seçimini etmək kifayətdir.