RTX 5090D V2: Çin Bazarı üçün Yenilənmiş, Amma Bahalı Qrafik Kartı

Nvidia şirkəti Çin bazarı üçün xüsusi olaraq hazırlanmış RTX 5090D qrafik kart seriyasına yenilənmiş RTX 5090D V2 modelini təqdim edib. Avqustun 12-də Çin bazarında satışa çıxarılacaq yeni model əvvəlki versiyaya nisbətən bir sıra texniki dəyişikliklərə malikdir. Bu dəyişikliklər əsasən texniki xüsusiyyətlərdə hiss olunur.

Əsas xüsusiyyətlərə gəldikdə: RTX 5090D V2, GB202-240 qrafik prosessoru əsasında qurulub və 21760 CUDA nüvəsinə malikdir. 24 GB GDDR7 VRAM ilə təchiz olunmuş kartın yaddaş yolu 384 bitdir. Əvvəlki model 32 GB VRAM ilə fərqlənirdi. Yəni, yeni versiyada VRAM tutumu 25% azalıb. Bu azalma oyun performansına birbaşa təsir etməsə də, yüksək yaddaş tələb edən peşəkar tətbiqlərdə məhdudiyyət yarada bilər.

Nominal istilik dizayn gücü (TDP) 575 Vt olaraq qalmışdır, lakin istehsalçılar 600 Vt-a qədər enerji istehlakına icazə verilib. Bu da Colorful kimi istehsalçılara daha aqressiv saat sürətlərinə malik xüsusi versiyalar hazırlamaq imkanı verir. Kartın ən diqqət çəkən cəhəti isə qiymətidir. Nvidia-nın əsas tərəfdaşlarından biri olan Colorful, JD.com saytında RTX 5090D V2-nin dörd fərqli variantını 20699 ilə 20999 Çin yuanı arasında (təxminən 2880 - 2900 ABŞ dolları) qiymətlərlə satışa çıxarıb.

Bu qiymət əvvəlki proqnozlardan xeyli yüksəkdir. İlkin qiymət proqnozları RTX 5090D V2-nin təxminən 14000 yuan olacağını göstərirdi. Nəticədə, Çin istifadəçiləri əvvəlki modellə müqayisədə texniki xüsusiyyətləri azaldılmış bir məhsul üçün təxminən eyni qiymətə sahib olacaqlar. ABŞ-ın ixrac məhdudiyyətləri səbəbindən Nvidia Çin bazarı üçün xüsusi modellər istehsal etməyə davam edir və RTX 5090D V2 bu strategiyaya uyğun olaraq mövqeləndirilib. Yeni modelin Çin xaricində satışa çıxarılması gözlənilmir.