Sevilən Need for Speed oyununun onlayn xidmətləri bağlanır

2013-cü ildə buraxılan Need for Speed: Rivals oyununun çoxoyunçu serverləri Electronic Arts tərəfindən 7 oktyabr 2025-ci ildə bağlanacaq. Bu, EA tərəfindən onlayn dəstəyi dayandırılan yeddinci Need for Speed oyunu olacaq. Rivals artıq yolunun sonuna çatıb.

Ghost Games (indi EA Gothenburg) və Criterion Games ilə birgə hazırlanan oyun, seriyadakı 20-ci əsas hissə kimi təqdim olunmuş və ilk dəfə 2013-cü ilin noyabr ayında PC, PlayStation 3, PlayStation 4, Xbox 360 və Xbox One platformalarında satışa çıxarılmışdı. Buraxılış zamanı müsbət rəylər alsada, başlanğıcda yaşanan texniki problemlər ümumi reytinqlərini aşağı salmışdı. Buna baxmayaraq, Rivals uzun müddət 2010-cu illərin ən yaxşı Need for Speed oyunlarından biri olaraq qalmış, arkad yarış janrına yeni başlayan oyunçular üçün yaxşı bir başlanğıc nöqtəsi hesab olunmuşdur.

7 oktyabrda həyata keçiriləcək bağlanma bütün platformaları əhatə edir. PC, PS4 və Xbox One istifadəçiləri də daxil olmaqla bütün oyunçular onlayn xüsusiyyətlərə daxil ola bilməyəcəklər. Oyunun rəqəmsal mağaza səhifələri də bu barədə yeni bir xəbərdarlıqla yenilənib.

Bu qərarla EA, oktyabr ayında daha dörd oyunun serverlərinin bağlanacağını təsdiqləyib. Need for Speed: Rivals-dan bir gün əvvəl, 6 oktyabrda NHL 21, 20 oktyabrda Madden 22 və 30 oktyabrda isə FIFA 23 onlayn dəstəyini itirəcək. EA adətən bu tip bağlamaları bir neçə ay əvvəlcədən elan edir. Buna görə də, oktyabr ayında oxşar taleyi yaşayacaq digər oyunların 2025-ci ilin avqust ayına qədər elan olunması gözlənilir.