WhatsApp Keçid Açarları Vasitəsilə Söhbət Ehtiyat Nüsxələrinin Təhlükəsizliyini Artırır

WhatsApp messencer ucdan-uca şifrələnmiş söhbət ehtiyat nüsxələri üçün yeni keçid açarı (passkey) dəstəyini elan etdi. Bu əlavə sayəsində istifadəçilər artıq mürəkkəb şifrə və ya uzun şifrələmə açarı daxil etmədən öz söhbət tarixlərinə təhlükəsiz şəkildə daxil ola biləcəklər. WhatsApp bu təhlükəsizliyə çatmaq üçün yeni yanaşma tətbiq edir. Keçid açarları istifadəçilərə mesaj tarixçəsini üz tanıma, barmaq izi skanı və ya cihazlarının ekran kilidi vasitəsilə tez bir zamanda şifrələməyə və deşifrələməyə imkan verir. Bu xüsusiyyət şifrələnmiş ehtiyat nüsxələrə daha əlverişli və təhlükəsiz bir giriş üsulu təqdim edir.

İstifadəçilər cihazlarını itirdikdə və ya sıfırladıqda, ehtiyat nüsxələrinə daxil olmaq üçün uzun bir şifrəni və ya 64 simvoldan ibarət uzun giriş açarını daxil etmək məcburiyyətində qalmırlar. Əksinə, onlar barmaq izlərini, üz skanını və ya ekran kilidi şifrəsini daxil edərək şifrələnmiş söhbət tarixinə dərhal giriş əldə edə bilərlər. Bu yenilik, bərpa prosesini həm təhlükəsiz, həm də sürətli edir. Bu funksiya köhnə şifrələmə metodlarının çatışmazlıqlarını aradan qaldırır, çünki əvvəlki sistemdə istifadəçilər mütləq ehtiyat nüsxə şifrəsini yadda saxlamalı və ya bərpa zamanı şifrələmə açarını hazır tutmalı idilər. Yeni keçid açarı sistemi isə bu açarı axtarmaq və ya yadda saxlamaq zərurətini tamamilə ortadan qaldırır.

Qeyd etmək lazımdır ki, uzun illər ərzində WhatsApp-ın söhbət ehtiyat nüsxələri üçün heç bir şifrələmə qatı yox idi. 2021-ci ildə isə "Meta" şirkəti istifadəçilərə şifrə və ya 64 simvollu şifrələmə açarından istifadə etməklə ehtiyat nüsxələrini ucdan-uca şifrələməklə qorumağa imkan verən bir sistem əlavə etdi. Həmin sistem o vaxt böyük bir təhlükəsizlik irəliləyişi olsa da, istifadə rahatlığı baxımından çatışmazlıqlar yaradırdı. Yeni tətbiq edilən keçid açarı dəstəyi isə WhatsApp-ın təhlükəsizlik məsələlərinə nə qədər ciddi yanaşdığını göstərir və təhlükəsizliyi istifadə rahatlığı ilə birləşdirir.

Bütün digər yeniliklərdə olduğu kimi, WhatsApp keçid açarı ilə şifrələnmiş ehtiyat nüsxələrini istifadəçilərə tədricən tətbiq edir. İstifadəçilər bu yeni ehtiyat nüsxəsi metodunu aktivləşdirmək üçün proqramın daxilindəki Parametrlər > Söhbətlər > Söhbət ehtiyat nüsxəsi > Ucdan-uca şifrələnmiş ehtiyat nüsxəsi yolunu izləyə bilərlər.