Xiaomi YU7 İstehsalına Başlandı! İlk 500 Maşın Zavoddan Çıxdı

Çinin aparıcı şəhərlərindəki salonlarda nümayiş olunmaq üçün istehsal edilən 500-dən çox YU7, Pekindəki Xiaomi-nin F1 (1-ci mərhələ) zavodunda yığılıb. 26 iyun tarixində satışa çıxmazdan əvvəl Xiaomi-nin yeni elektrikli SUV modeli YU7 istehsal xəttindən çıxmağa başlayıb.

Hələ istismara verilməmiş F2 (2-ci mərhələ) zavodunun istehsala başlamadığını nəzərə alaraq, bütün YU7 istehsalı hazırda SU7 sedan və SU7 Ultra ilə eyni xətdə həyata keçirilir. Mayın 22-də Çində rəsmi olaraq təqdim edilən Xiaomi YU7, həmin ay ərzində əsas şəhərlərdəki dilerlərə statik nümayiş üçün təhvil verilib.

Avtomobilin istehsal prosesinə dair detallar satışa çıxmazdan bir gün əvvəl Çinli "National Business Daily" tərəfindən paylaşılıb. Xəbərdə Xiaomi Avtonun əvvəlcə yalnız nümayiş məqsədilə avtomobil istehsal etdiyi və bu avtomobillərin satışa çıxarılmayacağı bildirilib. Zavod işçiləri hər gün müxtəlif sayda YU7 krossoverinin istehsal xəttindən çıxdığını və əsas məqsədin avtomobilləri salonlara göndərmək olduğunu bildiriblər.

Xiaomi-nin F2 zavodu yalnız YU7 istehsalına həsr olunmaq üçün hazırlanır. Zavoda Xiaomi loqosu yerləşdirilib və istehsal xəttinin quraşdırılması prosesi başa çatıb. Lakin istehsalın nə vaxt başlayacağı hələ dəqiq deyil. Şirkətin F1 və F2 adları eyni obyektin iki ayrı istehsal mərhələsini təmsil edir.

Baş direktor Ley Cünün əvvəllər paylaşdığı məlumata görə, YU7 SUV modelinin SU7 sedanla yalnız 10% ortaq hissəsi var. Buna görə də, eyni xətdə müxtəlif platformaların istehsalı prosesdə çətinliklər yaradır. Xiaomi App məlumatlarına görə, bu vəziyyət SU7-nin çatdırılma vaxtına təsir göstərir. İyun ayının əvvəlində 47-50 həftə olan çatdırılma müddəti hazırda 49-52 həftəyə qədər artıb.

Mart 2024-cü ildə Xiaomi Qrupunun ictimai əlaqələr meneceri Van Hua istehsal gücünün artırıldığını və 300 min ədəd çatdırılma hədəfinin qoyulduğunu elan edib. Bu hədəf daha sonra 480 min ədədə qaldırılıb. China EV DataTracker məlumatlarına görə, Xiaomi Auto 2025-ci ilin ilk beş ayında ümumilikdə 132.467 avtomobil satıb.

Xiaomi YU7-nin texniki xüsusiyyətləri də diqqət çəkir. SUV modelinin uzunluğu 4999 mm, eni 1996 mm, hündürlüyü 1608 mm və təkər bazası 3000 mm-dir. Giriş səviyyəli model 235 kVt (315 at gücü) istehsal edən tək elektrik mühərriki ilə təchiz edilib. Bu mühərrik 96.3 kVt saatlıq LFP batareyası ilə qidalanır və 835 km-ə qədər CLTC məsafəsi təklif edir. 0-dan 100 km/saat sürətə 5,88 saniyədə çatır və maksimum sürəti 240 km/saatdır. YU7 Pro versiyası ikimühərrikli tam ötürücü sistemə malikdir. Eyni batareya ilə 770 km məsafə təklif edən və 0-dan 100 km/saat sürətə 4,27 saniyədə çatan bu versiyanın gücü 365 kVt (489 at gücü) təşkil edir. Ən yüksək model olan YU7 Max isə 508 kVt (681 at gücü) gücə malikdir. 101,7 kVt saatlıq NMC batareyasından istifadə edən bu versiya 760 km məsafə təklif edir. Model 0-dan 100 km/saat sürətə 3,23 saniyədə çatır və maksimum sürəti 253 km/saatdır. YU7 Max həmçinin iki kameralı hava süspansiyonu və dörd pistonlu Brembo əyləc kaliperləri ilə təchiz edilib.