Yanğına Davamlı Litium Bərk Cisim Batareyası İnkişaf Etdirildi!

Cənubi Koreyanın Daegu Gyeongbuk Elm və Texnologiya İnstitutunda (DGIST) bərk cisimli batareyaların əsas problemini həll edən yeni, yanğına davamlı bir dizayn yaradılıb. Yeni lityum batareyalar elektrikli nəqliyyat vasitələrində və digər enerji saxlama sistemlərində istifadə üçün nəzərdə tutulan batareyaların təhlükəsizliyini və səmərəliliyini artıracaq.

Bildiyiniz kimi, bərk cisimli batareyalar adi lityum-ion batareyalara nisbətən 3-4 dəfə daha çox enerji saxlama qabiliyyətinə malikdirlər. Lakin, bu batareyaların istehsalında rast gəlinən texniki problemlər dendrit əmələgəlməsi səbəbindən qısaqapanma və yanğın riskini artırır. Dendritlər lityum ionlarının kristal budaqlar şəklində böyüməsinə səbəb olur və batareyanın içərisindəki elektrik əlaqələrini zədələyir.

Bu problemləri həll etmək üçün DGIST tədqiqatçıları xüsusi üçqatlı bir dizayn hazırlayıblar: Yanğına davamlı təbəqə (dekabromodifenil efirindən istifadə olunur, yanğın riskini minimuma endirir); Zeolite təbəqəsi (daha təhlükəsiz enerji ötürülməsi üçün ion mübadiləsində üstün performans təmin edir); Yüksək sıxlıqlı lityum duzu təbəqəsi (yük daşıyıcılarının hərəkətini sürətləndirməklə enerji səmərəliliyini artırır).

Testlərə görə, yeni batareyalar 1000 şarj dövründən sonra tutumlarının 87,9%-ni saxlaya biliblər. Bundan əlavə, enerji sıxlığı 700 vatt-saat/kq-dan çox olub ki, bu da elektrikli nəqliyyat vasitələri və digər tətbiqlər üçün kifayət qədər performans təmin edir. Bu həm səmərəlilik, həm də təhlükəsizlik baxımından böyük bir irəliləyişdir. Qısaca desək, yeni yanğına davamlı bərk cisimli batareyalar enerji sıxlığını artırmaqla yanaşı, təhlükəsiz və uzunömürlü bir enerji saxlama həlli təklif edə bilər.