8 Noyabr - Zəfər Günü münasibətilə Bakıda təntənəli bayram konserti keçirilir (FOTO)

8 Noyabr – Zəfər Günü münasibətilə Bakının Dənizkənarı Milli Parkında böyük bayram konserti keçirilir. Bu təntənəli tədbirdə Azərbaycanın tanınmış incəsənət ustaları, müğənnilər və rəqs kollektivləri iştirak edir. Konsert Heydər Əliyev Fondu, Azərbaycan Respublikası Mədəniyyət Nazirliyi və Bakı Şəhər İcra Hakimiyyətinin birgə təşkilatçılığı ilə həyata keçirilir.

Bu tədbir Prezident, Müzəffər Ali Baş Komandan İlham Əliyevin rəhbərliyi ilə Azərbaycan Ordusunun 44 günlük Vətən müharibəsində düşmən üzərində qazandığı parlaq qələbənin beşinci ildönümünə həsr edilib. Bu şanlı Qələbə ölkəmizin hər yerində olduğu kimi, paytaxtda da böyük sevinclə qeyd edilir. Təntənəli qeyd etmələr Vətən müharibəsində göstərilən rəşadəti xatırladır.

Bayram tədbirinin keçirildiyi ərazilərdə xüsusi şən ab-hava yaradılıb. Mərkəzi küçə və prospektlər, eləcə də istirahət parkları Vətən müharibəsində qazanılmış şanlı Zəfərin 5-ci ildönümünə həsr olunmuş plakatlarla bəzədilib. Şəhərdəki binaların eyvanlarından üçrəngli Azərbaycan Bayrağı fəxrlə dalğalanır, bu da bayramın əzəmətini göstərir.