ABŞ Kanada ilə ticarət danışıqlarını dayandırıb - Tramp

ABŞ Prezidenti Donald Trampın bəyanatına görə, Vaşinqton Ottava ilə ticarət danışıqlarını təxirə salıb. Bu qərarın səbəbi Kanada rəsmilərinin rüsumları tənqid edən reklam çarxlarına pul ödəməsi olub. Tramp bu barədə özünün "Truth Social" sosial şəbəkəsində yazıb.

ABŞ prezidenti həmin reklamın mahiyyətinə toxunub. O bildirib ki, reklam çarxında ABŞ-nin 40-cı prezidenti Ronald Reyqan rüsumlar haqqında neqativ danışarkən təsvir olunub. D. Tramp əlavə edib ki, Kanada rəsmiləri bu hərəkəti yalnız ABŞ Ali Məhkəməsinin və digər məhkəmələrin qərarına təsir göstərmək məqsədi ilə ediblər. Ticarət danışıqları buna görə dayandırılıb.

Prezident Tramp rüsumların ABŞ üçün çox vacib olduğunu vurğulayıb. Onun sözlərinə görə, rüsumlar ölkənin milli təhlükəsizliyi və iqtisadiyyatı üçün mühüm əhəmiyyət daşıyır. O, "bu zərərli hərəkətlərə görə" Kanada ilə bütün ticarət əlaqələrinin dayandırıldığını qeyd edib.