Akademik Musiqili Teatrda "Gülçöhrə və Əsgər" tamaşasının premyerası olub

Noyabrın 18-də Azərbaycan Dövlət Akademik Musiqili Teatrında Xalq yazıçısı Kamal Abdullanın eyniadlı pyesinin motivləri əsasında səhnələşdirilən "Gülçöhrə və Əsgər" tamaşasının premyerası baş tutdu. Bu ikihissəli musiqili dram dahi Üzeyir Hacıbəylinin məşhur "Arşın mal alan" əsərinin davamı sayılır. Tamaşanın ilk nümayişində Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva, həmçinin Arzu Əliyeva və Alena Əliyeva iştirak edərək səhnə əsərini izlədilər.

Yeni səhnə əsərinin bəstəkarı, Əməkdar incəsənət xadimi Cavanşir Quliyev tamaşaya fərqli bir yanaşma gətirildiyini bildirdi. O qeyd etdi ki, bu əsər "Arşın mal alan"dan fərqlənir, çünki xoşbəxt sonluqla bitmir. Bəstəkar süjetin gözlənilməz olduğunu və tamaşaçını daim diqqətdə saxladığını vurğuladı. Quliyev üçün bu, həm maraqlı, həm də dəyərli bir yaradıcılıq təcrübəsi oldu. Aktyor Səmədzadə Xasiyev, həm "Arşın mal alan", həm də "Gülçöhrə və Əsgər" tamaşalarında Əsgər obrazını canlandırır. O deyir ki, rolların hər ikisi çox xarakterikdir. O, yaradıcı heyətin tamaşa üzərində uzun müddət çalışdığını bildirdi.

Aktyorun sözlərinə görə, Əsgərin musiqili komediyadakı şən və romantik tərəfi ilə yeni əsərdəki dramatik taleyi ona aktyor kimi geniş ifadə imkanları açır. Əsgər və Gülçöhrənin ağır taleyi tarixin qaranlıq və sərt dönəmlərində yaşadıqları sarsıntıları göstərir. Bu, bütöv bir dövrün mənzərəsini yaradır. Əsgərin Sibirdə keçirdiyi məşəqqətli illər və Gülçöhrənin ümidsizlik içində onu gözləməsi hekayəsi təkcə nakam bir sevgi hekayəsi deyil. Bu, eyni zamanda bir xalqın yaddaşını, mübarizliyini və sarsılmaz ruhunu əks etdirən bədii salnamədir. İkihissəli musiqili dramda Telli obrazını oynayan Elnarə Nağdəliyeva isə obrazın mərhəmətli və şən bir qadın olduğunu vurğuladı. O, xanımına və bəyinə sadiq qalaraq, bütün çətinliklərə baxmayaraq, onlarla birlikdə İrana, İstanbula, sonra isə Fransaya qədər uzanan çətin yola çıxır.

Tamaşanın tamaşaçılarından olan Əməkdar incəsənət xadimi Məryəm Əlizadə səhnə əsərindən çox təsirləndiyini dedi. O qeyd etdi ki, tamaşa Azərbaycan Xalq Cümhuriyyəti dövründə baş verən siyasi və ictimai hadisələri, xüsusilə bolşeviklərin ölkəmizə vurduğu maddi və mənəvi zərbələrin acı nəticələrini yüksək ustalıqla əks etdirir. Gülçöhrə və Əsgərin mürəkkəb taleyi yüksək sənətkarlıqla təqdim olunur və izləyicidə güclü emosional təəssürat yaradır. Tamaşanın quruluşçu rejissoru Əsgər Əsgərov, dirijoru Fəxrəddin Atayev, baletmeysteri Nigar Şahmuradova, xormeysteri Vaqif Məstanovdur. Səhnə əsərində Əməkdar artistlər Əzizağa Əzizov, İlqar Salamov, Prezident mükafatçıları Səmədzadə Xasiyev, Mehriban Zaliyeva, Atilla Məmmədov və bir çox digər aktyorlar, eləcə də xor və balet artistləri iştirak ediblər.