Almaniyanın XİN başçısı İsrail və "Hizbullah"ı atəşkəsə riayət etməyə çağırıb

Almaniyanın Xarici İşlər naziri Yohann Vadeful İsrail və "Hizbullah" hərəkatına atəşkəs şərtlərinə riayət etmək üçün müraciət edib. Nazir bu bəyanatı Livana səfəri zamanı səsləndirib. Vadeful bildirib ki, onun üçün ən vacib məqam hər iki tərəfin atəşkəsi qorumasıdır. O vurğulayıb ki, bölgədəki sabitliyin mövcudluğu Avropada və Almaniyada təhlükəsizlik və sabitlik üçün vacib şərtdir.

Davamlı sülhə nail olmaq üçün bir neçə şərtin yerinə yetirilməsi lazımdır. Nazir qeyd edib ki, "Hizbullah" silahları yerə qoymalıdır, Livan hökuməti isə hərəkatın tərksilahı üçün etibarlı, şəffaf və sürətli bir proses təmin etməlidir. Vadeful hesab edir ki, atəşkəsə riayət etməyin ən əsas şərti İsrail Ordusunun Livanın cənub hissəsindən çıxarılması və ölkənin suverenliyinin qorunmasıdır. O, İsrailin şimaldakı təhlükəsizlik maraqlarına baxmayaraq, Təl Əvivin Livan dövlətinə və ordusuna cənuba nəzarəti bərpa etmək imkanı verməsini tələb edib. Nazirin fikrincə, yalnız bu yolla davamlı sülhə nail olmaq olar.

Almaniya XİN başçısı eyni zamanda uzunmüddətli perspektivdə Livan və İsrail arasındakı sərhəd məsələsinin danışıqlar yolu ilə həll edilməli olduğunu əlavə edib. Bundan əlavə, o, mandatı 2026-cı ildə başa çatacaq BMT-nin Livandakı Müvəqqəti Qüvvələrinin (UNIFIL) mandat müddətinin uzadılması fikrini Avropa İttifaqı daxilində təşviq etmək niyyətini açıqlayıb. Almaniya hökuməti artıq UNIFIL-in mandatı bitdikdən sonrakı dövrü nəzərdən keçirir.