"Hizbullah"ın baş katibi: Biz silahlarımızı yerə qoymayacağıq və döyüşdən əl çəkməyəcəyik

"Hizbullah" hərəkatının baş katibi Naim Qasem təşkilatın silahlı qanadını ləğv etmək niyyətində olmadığını açıqlayıb. O, eyni zamanda Livan hökumətini İsrailin ölkənin cənub hissəsindəki hərbi varlığına son qoymağa çağırıb. Qasem bəyan edib ki, ABŞ İsrail vasitəsilə Livan müqavimətini bitirmək istəyir. O, "Hizbullah"ın cihad, namus, Livanın qüruru və Fələstinə dəstək kimi prinsiplər üzərində qurulduğunu vurğulayıb.

Qasem'in sözlərinə görə, Amerika və İsrail Livanın gələcəyinə müdaxilə edir, həm hərbi, həm də siyasi və iqtisadi mövqeləri diktə edirlər. "Biz silahlarımızı yerə qoymayacağıq," deyə Naim Qasem bildirib. O qeyd edib ki, məhz bu silahlar sayəsində İsraillə atəşkəs əldə etmək mümkün oldu.

Hərəkatın lideri iddia edir ki, "Hizbullah" atəşkəs pozuntusuna səbəb ola biləcək heç bir addım atmayıb. Buna görə də, o, bu məsuliyyəti İsrail tərəfinin üzərinə qoyub. Qasem hərəkatın təslim olmayacağına və Livanı İsraildən müdafiə etməyə davam edəcəyinə söz verdi. Bu hadisələrin fonunda, 2024-cü ilin noyabr ayında İsrail ordusu ilə "Hizbullah" hərbi əməliyyatları dayandıraraq atəşkəs sazişi imzalamışdı. Həmin sazişə əsasən, İsrail ordusu tədricən Livan ərazisindən çıxmalı, ölkənin cənubundakı mövqelərini isə Livan hərbçilərinə təhvil verməli idi.