Avropa ABŞ-ni qitədəki qoşunlarının sayını azaltmamağa razı salmağa çalışır

Avropa rəsmiləri Amerika Birləşmiş Ştatlarını (ABŞ) qitədəki qoşunlarının sayını azaltmamağa razı salmağa çalışırlar. Bu təşəbbüs noyabr ayında Rumıniyada keçirilən hərbi təlimlərdən sonra xüsusilə aktuallaşıb, çünki həmin təlimlər Avropanın hələ də ABŞ hərbi dəstəyindən nə qədər asılı olduğunu göstərdi.

Vaşinqton öz müttəfiqlərini sakitləşdirməyə çalışır və onları kənarda qoymayacağını vəd edir. "Bloomberg" agentliyi Avropa rəsmilərinə istinadən bildirir ki, Avropa ölkələri müdafiə potensiallarını gücləndirmək üzərində işləsələr də, hələ də logistika və strateji təminat vasitələri ilə bağlı problemlərlə qarşılaşırlar.

Təlimlərdə iştirak edən rumın və Avropalı rəsmilər NATO müttəfiqlərinin cəbhə xəttinə çatmağı üçün nə qədər vaxt lazım olacağı barədə narahatlıqlarını ifadə ediblər. Onların sözlərinə görə, nəqliyyat infrastrukturundakı məhdudiyyətlər ucbatından bu, bir neçə həftə çəkə bilər.

Bu cür ləngimənin nəticələri ağırdır. Yardım gələnə qədər Rumıniyanın quru qoşunları, agentliyin qeyd etdiyi kimi, demək olar ki, təkbaşına hücumu dəf etməli olacaq. Bu vəziyyət Avropa ölkələrinin müstəqil hərəkət etmək qabiliyyətinin hələ də formalaşma mərhələsində olduğunu və ABŞ hərbi varlığına olan ehtiyacın davam etdiyini göstərir.