Avrozonada dövlət borcunun ÜDM-ə nisbəti artıb

Bu ilin ikinci rübünün sonunda Avrozonada (EA20) və Avropa İttifaqında (Aİ) dövlətin ümumi borcunun ümumi daxili məhsula (ÜDM) nisbəti yüksəlib. Avropa İttifaqının Statistika İdarəsinin (Eurostat) məlumatına görə, Avrozonada bu nisbət 88,2 faizə çatıb. Bu rəqəm ilin birinci rübünün sonundakı 87,7 faiz göstəricisi ilə müqayisədə artıb.

Ümumilikdə Avropa İttifaqında da borcun ÜDM-ə nisbəti 81,5 faizdən 81,9 faizə yüksəldi. Borcun ÜDM-ə nisbəti ötən ilin ikinci rübü ilə müqayisədə həm avrozonada (87,7 faizdən 88,2 faizə), həm də bütövlükdə Avropa İttifaqında (81,2 faizdən 81,9 faizə) artım göstərib. Bu məlumatlar regionda dövlət borcunun yükünün davamlı olaraq artdığını təsdiqləyir.

Eurostat, həmçinin dövlət borcunun tərkibini də açıqlayıb. Məlumata görə, dövlət borcunun əsas hissəsini qiymətli kağızlar təşkil edir. Bu kateqoriya avrozonada borcun 84,2 faizini, Aİ-də isə 83,7 faizini təşkil edir. Kreditlərin payı avrozonada 13,2 faiz, Aİ-də isə 13,8 faiz olub. Pul və depozitlər isə hər iki iqtisadi məkan üzrə 2,5 faiz təşkil edərək ən az hissəni təşkil edir.

Dövlət borcunun ÜDM-ə nisbəti üzrə üzv ölkələr arasında ciddi fərqlər var. Ən yüksək göstəricilər Yunanıstanda (151,2 faiz) müşahidə olunub. Ondan sonra İtaliya (138,3 faiz), Fransa (115,8 faiz), Belçika (106,2 faiz) və İspaniya (103,4 faiz) gəlir. Bu ölkələrdə borc həcmi ÜDM-dən xeyli yüksəkdir. Əksinə, Ən aşağı borc göstəriciləri Estoniyada (23,2 faiz), Lüksemburqda (25,1 faiz), Bolqarıstanda (26,3 faiz) və Danimarkada (29,7 faiz) qeydə alınıb.

Avropa İttifaqı iqtisadiyyatlarında dövlət borcunun artması tendensiyası davam edir. Həm rüblük, həm də illik müqayisədə müşahidə olunan bu artım, xüsusilə cənub ölkələrində borc yükünün həyəcan verici səviyyədə qaldığını göstərir.