Azərbaycan Süni İntellektlə İdarə Olunan Rəqəmsal İqtisadiyyat üzrə İnnovasiya Forumuna qatılıb

Azərbaycan Çinin Şanxay şəhərində keçirilmiş Süni İntellektlə İdarə Olunan Rəqəmsal İqtisadiyyat üzrə İnnovasiya Forumunda iştirak edib. Bu məlumat İqtisadiyyat Nazirliyinə istinadən verilir.

Baş nazirin müavini Şahin Mustafayevin rəhbərliyi ilə nümayəndə heyəti Çinə səfər edib. Heyət Şanxayda keçirilən 8-ci Çin Beynəlxalq İdxal Sərgisinə qatılıb. Sərgidə Çinin Baş naziri Li Çian, hökumət nümayəndələri, beynəlxalq təşkilatların təmsilçiləri və aparıcı texnologiya şirkətlərinin rəhbərləri iştirak edirdilər.

İqtisadiyyat nazirinin I müavini Elnur Əliyev sərgi çərçivəsində təşkil edilmiş İnnovasiya Forumunda çıxış etdi. O, Azərbaycanın rəqəmsal və dayanıqlı iqtisadiyyatın qurulması istiqamətində həyata keçirdiyi islahatları qeyd etdi. Əliyev vurğuladı ki, ölkəmiz "Azərbaycan 2030: Sosial-iqtisadi inkişaf üzrə Milli Prioritetlər"ə uyğun olaraq davamlı, inklüziv və innovasiyaya əsaslanan rəqəmsal iqtisadiyyat modelini formalaşdırır.

Nazir müavini insan kapitalının və innovasiya yönümlü iqtisadiyyatın inkişafının ölkənin inkişaf strategiyasının prioritetlərindən olduğunu diqqətə çatdırdı. Azərbaycan rəqəmsal təhsil ekosistemini və ömürboyu təhsili yaratmaq üçün dünyanın qabaqcıl təhsil proqramları ilə əməkdaşlıq edir. Məsələn, "Coursera" ilə əməkdaşlıq dövlət qurumları, universitetlər və beynəlxalq tərəfdaşlar arasında yeni sinerji yaradır. Artıq 45 mindən çox vətəndaş "Coursera Milli Proqramı" çərçivəsində IV Sənaye İnqilabı texnologiyaları və digər sahələrdə bilik və bacarıqlar əldə edib. Forumda həmçinin bulud sistemləri, 5G və kiber təhlükəsizliyin modernləşdirilməsi kimi rəqəmsal infrastrukturun inkişafı, eləcə də məlumat əsaslı qərarların qəbulu mexanizmləri barədə müzakirələr aparıldı.