Azərbaycan UNESCO-da mədəni irsin qorunması ilə bağlı komitəyə üzv seçilib

Azərbaycan BMT-nin Elm, Təhsil və Mədəniyyət Təşkilatının (UNESCO) ən vacib komitələrindən birinə üzv seçilib. Ölkəmiz UNESCO-nun Baş Konfransının 43-cü sessiyasında 2025–2029-cu illər üçün Hökumətlərarası Komitəyə daxil oldu.

Azərbaycanın üzv seçildiyi bu komitə "Mənşə ölkələrinə mədəni əmlakın qaytarılmasının və ya qanunsuz mənimsənilmə hallarında onun bərpasının təşviqi üzrə Hökumətlərarası Komitə" (ICPRCP) adlanır. Konfransın 43-cü sessiyası Səmərqənd şəhərində keçirilmişdi.

Bu seçki Azərbaycanın beynəlxalq səviyyədəki fəaliyyətinə verilən yüksək qiymət kimi dəyərləndirilir. Xarici İşlər Nazirliyi sosial mediada yaydığı məlumatda qeyd edib ki, bu, Azərbaycanın mədəni irsin qorunması və bərpası istiqamətindəki prinsipial mövqeyinə, həmçinin fəal təşəbbüslərinə görə verilən dəstəkdir. Bu uğur Azərbaycanın xarici siyasətinin mühüm nailiyyətlərindən hesab olunur.