Bağçalara tərbiyəçi-müəllimlərin işə qəbulu üzrə test imtahanı başa çatıb

Məktəbəqədər təhsil müəssisələrinə tərbiyəçi-müəllimlərin işə qəbulu məqsədilə təşkil edilən test imtahanı yekunlaşıb. Bu prosesə maraq çox yüksək olub; ümumilikdə 4371 namizəd imtahanda iştirak edib. Bu test mərhələsi iştirakçıların ilkin bilik səviyyəsini, pedaqoji hazırlığını və metodiki bacarıqlarını müəyyən etmək üçün həyata keçirilir.

İmtahan nəticələri ilə bağlı məlumat Bakı Şəhəri üzrə Təhsil İdarəsi və Regional Təhsil İdarələri tərəfindən elan olunacaq. Nəticələr idarələrin rəsmi internet saytlarında və sosial şəbəkə hesablarında dərc ediləcək. Keçid balını toplayan və vakansiya seçimi edən namizədlər növbəti addım olan müsahibə mərhələsinə dəvət ediləcəklər.

Müsahibə mərhələsi mütəxəssislərin peşəkarlıq səviyyəsini daha dərindən qiymətləndirməyə yönəlib. Bu mərhələdə namizədlərə ünsiyyət və təqdimetmə bacarıqları, məktəbəqədər təhsil sahəsində pedaqoji və metodiki hazırlıqları ilə bağlı suallar veriləcək. Həmçinin peşəyə yanaşma və etik dəyərlər də diqqətdə saxlanılacaq. Müsahibədə uğur qazanan və test imtahanında ən yüksək nəticə göstərən namizədlər birbaşa işə qəbul ediləcəklər. Digər uğurlu iştirakçılar isə gələcək təyinatlar üçün ehtiyat siyahısında saxlanılacaqlar.