Bakı Ali Neft Məktəbinin yaradılmasından 14 il ötür

SOCAR-ın Bakı Ali Neft Məktəbinin (BANM) yaradılmasından bu gün 14 il ötür. Prezident İlham Əliyevin 29 noyabr 2011-ci il tarixli Fərmanı ilə SOCAR-ın strukturunda yaradılan bu ali təhsil müəssisəsi ötən illər ərzində mühüm uğurlara imza atıb. BANM hər cür şəraiti olan kampus binası və bir korpus tikilərək istifadəyə verilib. Bu ali məktəb ölkədə ən yüksək keçid balına malik təhsil müəssisəsi kimi tanınır. BANM ilk qəbul aparılan ildə Dövlət İmtahan Mərkəzinin (DİM) reytinq cədvəlindəki 51 ali təhsil müəssisəsi arasında lider olub. Məktəb Prezident təqaüdçülərinin sayına görə Azərbaycan təhsil tarixində rekord göstərərək liderliyini ardıcıl olaraq qoruyur. Bu il BANM 36 Prezident təqaüdçüsü ilə öz rekordunu yeniləyib.

Ali Məktəb illər keçdikcə ixtisaslaşma sahələrini xeyli genişləndirib. İlk ildə yalnız iki ixtisas üzrə qəbul həyata keçirilsə də, hazırda Bakı Ali Neft Məktəbi 9 ixtisas üzrə bakalavr, 8 ixtisaslaşma üzrə magistratura və 3 ixtisas üzrə doktorantura səviyyələrinə qəbul aparır. Əvvəllər yalnız I ixtisas qrupu üzrə qəbul edilirdisə, son illərdə II ixtisas qrupunun Biznesin idarəedilməsi ixtisasında da qəbul aparılır. Bu il isə ilk dəfə II ixtisas qrupu üzrə Maliyyə ixtisasına tələbə qəbul edilib. Bu qrupa ilk dəfə qəbul aparılmasına baxmayaraq, Prezident təqaüdçüsü olan 25 tələbədən 12-si məhz bu yeni açılmış ixtisasın tələbəsi olub. Bakı Ali Neft Məktəbi əmək bazarının tələblərinə cavab verən ixtisaslarda qəbul aparır. Bu il BANM-in təşəbbüsü ilə ölkədə ilk dəfə Data analitikası ixtisasına qəbul həyata keçirilib; bu ixtisas da ilk ilindən ən yüksək bal toplayan abituriyentlərin seçimi olub.

Bakı Ali Neft Məktəbinin məzunlarının işlə təmin olunma göstəricisi 100% təşkil edir. Məzunlar SOCAR-da, müxtəlif transmilli şirkətlərdə, dövlət qurumlarında və nüfuzlu müəssisələrdə işləyirlər. Dövlət Məşğulluq Agentliyinin (DMA) 2025-ci il statistikası da bunu təsdiqləyir. DMA-nın 2025-ci il üzrə məzunları ən çox iş tapan TOP 5 universitet siyahısında Bakı Ali Neft Məktəbi liderdir. Ali Məktəb startaplar və innovasiyalar sahəsində də lider mövqedədir. Tələbələr bu illər ərzində bir çox beynəlxalq və yerli yarışlarda uğur qazanıb. Təkcə 2025-ci ildə 30-dan çox startap layihəsi təqdim olunub və 20-dən çox hakatonda qalibiyyət əldə edilib. "Teknofest 2025"də komandalar 1 qızıl, 1 gümüş, 2 bürünc medal və 4 xüsusi mükafat qazanaraq ən çox mükafat qazanan ali təhsil müəssisəsi olub.

BANM-in beynəlxalq əlaqələri bu illər ərzində genişlənib, əcnəbi tələbələrin sayı əhəmiyyətli dərəcədə artıb. Bu il əcnəbi tələbələrin sayında 67% artım qeydə alınıb. BANM Azərbaycan ali təhsil sistemində ilk dəfə ali təhsil proqramlarının ixracını həyata keçirməyə başlayıb. SOCAR və "Uzbekneftegaz" arasında imzalanmış Anlaşma Memorandumuna əsasən, BANM Özbəkistanın Daşkənd Kimya-Texnologiyası İnstitutu və Buxara Dövlət Texniki Universiteti ilə ikili diplom proqramı həyata keçirir. Hazırda bu müəssisələrdən 16 özbək tələbə kimya mühəndisliyi ixtisasının magistratura səviyyəsinin 2-ci kursunda təhsil almaq üçün BANM-dədir. Məktəb eyni zamanda Konqoda insan kapitalının inkişafına dəstək göstərir; konqolu tələbələr məzun olduqdan sonra SNPC şirkətində çalışmaq şərti ilə BANM-də təhsil alırlar. 2025-ci ildə BANM-in bütün akademik proqramları Almaniyanın nüfuzlu ASIIN agentliyi tərəfindən ilk dəfə beynəlxalq proqram akkreditasiyasına cəlb olunub. "Times Higher Education (THE) Impact Rankings 2025"də BANM ölkə üzrə III yerdə, dünya universitetləri arasında isə 801–1000-ci yerlərdə qərarlaşıb. Bundan başqa, Bakı Ali Neft Məktəbinin tərkibində artıq Rəqəmsal Biliklər Liseyi də fəaliyyətə başlayıb.