Bakı–Ələt–Qazax magistralının sonuncu hissəsinin genişləndirilməsi yekunlaşmaq üzrədir

Azərbaycan Avtomobil Yolları Dövlət Agentliyi (AAYDA) Bakı–Ələt–Qazax magistralının son hissəsinin genişləndirilməsi işlərini başa çatdırmaq üzrədir. Bu yol "Böyük İpək yolu"nun əsas tərkib hissəsidir. Layihə Bakı–Ələt–Qazax–Gürcüstanla dövlət sərhədi avtomobil yolunun 130 kilometrlik Gəncə–Qazax–Gürcüstan sərhədi hissəsini əhatə edir. Bu hissə dörd hərəkət zolağına genişləndirilir. Agentliyin məlumatına görə, layihənin icrası uğurla davam edir və artıq yekunlaşma mərhələsindədir. Yol yatağının ümumi eni 27,5 metr təşkil edir. Magistralın dörd hərəkət zolağının hər birinin eni 3,75 metrdir. Bu yenidənqurma işləri bitdikdən sonra sürət limitinin yüksəldilməsi və vətəndaşların daha rahat, təhlükəsiz hərəkəti təmin ediləcək.

Magistralın Gəncə–Qazax–Gürcüstan sərhədi hissəsində tikinti işləri üç Lot üzrə həyata keçirilib. Birinci və İkinci Lotlar, eləcə də Üçüncü Lotun bir hissəsi üzrə işlər tam başa çatdırılıb. 2023-cü il avqustun 7-də Prezident İlham Əliyev ümumi uzunluğu 102 kilometr olan Gəncə–Qazaxbəyli hissəsinin açılışında iştirak etmişdi. "Regionların 2019–2023-cü illərdə sosial-iqtisadi inkişafı Dövlət Proqramı" çərçivəsində yenidən qurulan 1b texniki dərəcəli yolun bu hissəsində 67 altkeçid, 19 qovşaq və 17 körpü tikilərək istifadəyə verilib. Hazırda tikinti işləri magistralın son 28 kilometrlik Qazaxbəyli–Gürcüstan sərhədi hissəsində – layihənin 102.2–130.150-ci kilometrlərində – son mərhələdədir. Tikinti prosesi vətəndaşların magistral yolda hərəkətini dayandırmadan icra olunur.

Qazaxbəyli–Gürcüstan sərhədi hissəsi boyunca dörd yol qovşağı və ötürücüsü, iki çay körpüsü, 15 yeraltı keçid, 13 düzbucaqlı su keçidi və 68 dairəvi suötürücü boru inşa edilib. Layihəyə uyğun olaraq zəruri yerlərdə 28 avtobus dayanacağı quraşdırılıb. Hazırda ərazidə işıqlandırma sistemi qurulur, drenaj beton kanalları çəkilir və təhlükəsizlik bordürlərinin düzülməsi işləri aparılır. Yolun iri yaşayış məntəqələrindən kənar keçməsi həm əhalinin, həm də sürücülərin təhlükəsizliyi baxımından mühümdür. Bakı–Qazax–Gürcüstan sərhədi magistral yolu beynəlxalq nəqliyyat dəhlizinin Azərbaycandan keçən əsas hissələrindən biridir. Layihə tam başa çatdıqdan sonra, "Böyük İpək yolu"nun Azərbaycandan keçən bu hissəsi Avropa ilə Asiya arasında beynəlxalq və daxili yükdaşımaların artırılmasına böyük töhfə verəcək.