Bakı sakinləri Zəfərin beşinci ildönümünü qeyd edir - YENİLƏNİB

Paytaxt Bakı 8 Noyabr - Zəfər Gününün ildönümünü qeyd edir, şəhərin küçə və meydanlarında böyük bir coşqu yaşanır. Həm Bakı sakinləri, həm də Azərbaycanın digər regionlarından gələn vətəndaşlar səhər saatlarından başlayaraq hərbi paradın keçiriləcəyi ərazilərə doğru axın edirlər. İnsanlar bu tarixi günü qeyd etmək üçün Bakının mərkəzi hissələrində toplaşırlar, paradın keçiriləcəyi yerlərə yaxınlaşmağa çalışırlar.

Bayram əhval-ruhiyyəsi paytaxtın demək olar ki, bütün hissələrini əhatə edib. Şəhər sakinləri küçələrə çıxaraq ordunun qəhrəmanlığını və bu böyük qələbəni xatırlayırlar. Onlar əllərində Azərbaycan bayraqları və plakatlarla izdihamlı Zəfər yürüşləri təşkil edirlər. Mərkəzi prospektlərdə şən musiqilər səslənir, bu da ümumi bayram atmosferini daha da gücləndirir.

Şəhər sakinləri və qonaqlar bu günü xüsusi qürur hissi ilə yad edirlər. Onlar şəhidlərin xatirəsini anır, ölkənin ərazi bütövlüyünün bərpası uğrunda gedən mübarizədə göstərilən cəsarətə böyük ehtiram göstərirlər. Azərbaycanın fərqli bölgələrindən gələn insanların paytaxta axın etməsi bu qələbənin bütün xalq üçün necə böyük bir əhəmiyyət daşıdığını göstərir. Bütün Bakı bu əlamətdar gün münasibətilə bayram ab-havasına bürünüb.