Bakıda "Euronews" ofisinin açılış mərasimi keçirilib (FOTO)

17 noyabr tarixində Bakıda "Euronews" ofisinin təntənəli açılış mərasimi baş tutdu. Tədbir "Euronews"un Direktorlar Şurasının sədri Pedro Vargas Davidin açılış nitqi ilə başladı. David azərbaycanlı tərəfdaşlarla əməkdaşlığın gücləndirilməsinin və "Euronews"un regiondakı mövcudluğunun genişləndirilməsinin əhəmiyyətini xüsusi vurğuladı.

Mərasim zamanı artıq həyata keçirilmiş birgə layihələr təqdim olundu. Bundan başqa, tədbir çərçivəsində "Eurasia Talks" proqramının yeni buraxılışının çəkilişi aparıldı. Bu proqram Mərkəzi Asiya və Cənubi Qafqazda baş verən əsas siyasi, iqtisadi və sosial proseslərə diqqət ayırır. Programın mövzusu həmçinin bu proseslərin regionun Avropa ilə münasibətlərinə necə təsir göstərdiyini əhatə edir.

"Euronews" 20 dildə yayımlanan beynəlxalq xəbər telekanalıdır. Kanal öz fəaliyyətini aktual beynəlxalq hadisələrin işıqlandırılmasına yönəldir. Kanal Avropa ölkələri ilə qonşu region ölkələri arasında əməkdaşlığın inkişafına fokuslanır. Bakıda ofisin açılması bu əməkdaşlıq məqsədini dəstəkləyir.