Bakıda “Euronews”un yerli ofisi fəaliyyətə başlayır - FOTO

Bakıda Avropanın tanınmış media qurumu olan “Euronews” televiziyasının yerli ofisi fəaliyyətə başlayıb. Bu əhəmiyyətli hadisə ilə bağlı “Euronews”un Bakı ofisi üçün açılış mərasimi keçirildi. Tədbirə çox sayda qonaq qatıldı. Açılış mərasimində media nümayəndələri, diplomatlar və müxtəlif sahələrdən digər şəxslər iştirak edirdilər.

Mərasimdə çıxış edən “Euronews”un İdarə Heyətinin sədri Pedro Vargas David rəhbərlik etdiyi media qurumunun Azərbaycanla bağlı mövqeyini açıqladı. O bildirdi ki, “Euronews” hər zaman ölkəyə qarşı balanslı mövqe nümayiş etdirib. David qeyd etdi ki, məhz bu balanslı mövqe səbəbindən media qurumu bəzən müəyyən təzyiqlərlə üzləşib. O, Avropanın nüfuzlu media qurumunun Bakıdakı yeni ofisinin açılmasından məmnunluq duyduğunu vurğuladı.

Tədbir çərçivəsində Azərbaycan və “Euronews” arasında gələcək əməkdaşlığın inkişaf perspektivləri ətrafında müzakirələr aparıldı. Rəsmi çıxışlar və müzakirələr bitdikdən sonra açılış mərasimi mədəni proqramla davam etdirildi. Məlumat üçün bildirək ki, “Euronews” kanalı 1993-cü il yanvarın 1-də təsis edilib.