Bakıda SAF 2025-ə start verilib - FOTO

Elm və Təhsil Nazirliyinin dəstəyi və "STEAM Azərbaycan" layihəsinin təşkilatçılığı ilə Beynəlxalq STEAM Azərbaycan Festivalı Bakı Ekspo Mərkəzində başladı. Festival noyabrın 17-dən 19-dək davam edəcək. Tədbirin rəsmi açılış mərasiminə yüksək vəzifəli dövlət nümayəndələri, beynəlxalq təşkilatların təmsilçiləri, eləcə də xarici ölkələrdən gələn qonaqlar və özəl şirkət rəhbərləri qatılıblar. Bu geniş iştirak STEAM layihəsinin regionda və beynəlxalq səviyyədə artan əhəmiyyətini göstərir.

Festivalda 20-dən artıq ölkədən minlərlə şagird, tələbə, mentor və ekspert iştirak edir. Ümumilikdə 5000-dən çox iştirakçı qeydiyyatdan keçsə də, yalnız 1400-dən çox şəxs final mərhələsinə vəsiqə qazanıb. Yarış 18 fərqli kateqoriya üzrə təşkil edilir. Bu kateqoriyalar robototexnika, süni intellekt, bərpaolunan enerji, dron və peyk texnologiyaları kimi müasir sahələri əhatə edir. İştirakçılar həmçinin incəsənət, mühəndislik və innovativ layihələr üzrə öz bacarıqlarını nümayiş etdirirlər.

Qeyd edək ki, bu tədbirə qatılanların coğrafiyası olduqca genişdir. Festivalda təmsil olunan ölkələrin ümumi sayı 22 ölkə təşkil edir. Final mərhələsinə çıxan iştirakçıların 202 nəfəri 19 xarici ölkəni təmsil edir. Bu beynəlxalq bilik və texnologiya müsabiqəsi 19 noyabr tarixinə qədər davam edəcək və iştirakçılara öz layihələrini təqdim etmək üçün imkan yaradır.