Beynəlxalq səyyahlar Şuşaya səfər edib - YENİLƏNİB - FOTO

Beynəlxalq Səyyahlar Klubu (ETIC - Extreme Traveler International Congress) üzvləri Kolja Sporinin rəhbərliyi ilə Şuşa şəhərinə səfər ediblər. Bu beynəlxalq heyət artıq Qarabağın digər azad edilmiş ərazilərində, o cümlədən Ağdam, Xankəndi və Laçında olmuşdu. Səyyahların Şuşa turu Azərbaycanın məşhur şəxsiyyətləri - Natəvanın, Bülbülün və Üzeyir Hacıbəylinin güllələnmiş heykəllərinin yerləşdiyi mərkəzi meydandan başladı. Bu heykəllər işğal illərindəki vandalizmin əyani sübutlarıdır və qonaqlar üçün xüsusi əhəmiyyət daşıyır.

Qonaqlara şəhərin 30 illik işğal dövründə üzləşdiyi çətinliklər barədə geniş məlumat verildi. Bildirildi ki, bu müddət ərzində Şuşa şəhərində yerləşən tarixi binalar, qədim məscidlər və milli abidələr erməni vandalizminin qurbanı olublar. Şəhərin memarlıq irsinə qəsdən ziyan dəymişdi, saysız-hesabsız mədəniyyət nümunəsi dağıdılmışdı. Səyyahlar işğaldan əvvəlki vəziyyəti anlamaq və dağıntıların miqyasını görmək imkanı qazandılar.

Şuşa azad edildikdən dərhal sonra genişmiqyaslı bərpa və quruculuq işlərinə start verildi. Səyyahlara şəhərin tarixi simasını geri qaytarmaq üçün görülən miqyaslı yenidənqurma layihələri haqqında danışıldı. Onlar həm işğal dövründəki vəziyyətlə, həm də hazırda həyata keçirilən tikinti işləri ilə yaxından tanış oldular. Beynəlxalq heyətin bu səfəri Qarabağda turizmin inkişafına və regionun beynəlxalq ictimaiyyətə tanıdılmasına xidmət edir.