Bu il ilk dəfə TƏBİB tabeli xəstəxanalarda əmək fəaliyyətinə başlayan həkimlərin sayı AÇIQLANIB (ÖZƏL)

Bu ilin ötən dövrü ərzində TƏBİB-in tabeliyində fəaliyyət göstərən tibb müəssisələri ümumilikdə 510 nəfər həkim işə qəbul edib. Bu rəqəmlər TƏBİB-in kadr siyasətində gənc mütəxəssislərin sistemə cəlb olunmasının vacibliyini göstərir.

Bu barədə TƏBİB-in İctimaiyyətlə əlaqələr və kommunikasiya departamentinin rəhbəri Zamirə Ədilova məlumat verib. Onun sözlərinə görə, işə qəbul edilən şəxslərin xeyli hissəsi ilk dəfə olaraq əmək fəaliyyətinə başlayıb. Məsələn, 168 nəfər həkim rezidentura və ordinatura təhsilini bitirdikdən sonra təyinat alıb və TƏBİB-in tibb müəssisələrində işə başlayıb.

Bundan əlavə, 40 nəfər həkim xaricdə tibb təhsili alıb və onlar da ilk dəfə TƏBİB sistemində fəaliyyətə başlayıblar. TƏBİB gənc mütəxəssislərin səhiyyə sisteminə daxil olmasını təşviq etməyə davam edir. Qurum eyni zamanda onların peşəkar inkişafına şərait yaratmaq və bölgələrdə keyfiyyətli tibbi xidmətin təmin olunmasına nail olmaq məqsədilə müvafiq dəstək tədbirlərini davam etdirir. Bu, ölkədə tibbi kadr ehtiyatının gücləndirilməsi üçün atılan mühüm addımdır.