Çexiyada Nazirlər Kabinetinin istefası gözlənilir

Çexiya parlamentinin Deputatlar Palatasının (aşağı palatası) ilk iclası başa çatıb. Baş nazir Petr Fialanın başçılıq etdiyi hazırkı hökumətin yaxın zamanda istefa verəcəyi gözlənilir. Yerli media orqanlarından gələn xəbərlərə görə, indiki kabinet 6 noyabr səhəri toplanacaq. Onlar məhz bu iclasda istefa məsələsini müzakirə edəcəklər. Çexiya mediası əvvəllər bildirmişdi ki, istehfa həmin gün reallaşa bilər.

Hökumətin istefası rəsmi şəkildə respublika Prezidenti tərəfindən qəbul edilməlidir. Mövcud qaydalara əsasən, Prezident yeni kabinet təyin olunana qədər Baş nazirə və nazirlərə öz vəzifələrini müvəqqəti yerinə yetirməyi tapşırır. Bu siyasi dəyişikliyə səbəb olan hadisələr oktyabrın 3-ü və 4-ü keçirilən deputatlar palatasına seçkilərdir. Bu seçkilərdə müxalifət siyasi hərəkatları ən böyük uğuru qazandılar. Bu hərəkatlara ANO (Narazı Vətəndaşların Hərəkatı), "Azadlıq və Birbaşa Demokratiya", həmçinin "Avtomobilçilər" daxildir.

Həmin hərəkatlar noyabrın 3-də birlikdə hökumət koalisiyası yaratmaq barədə razılığa gəldilər. Koalisiyanın liderləri artıq əsas vəzifələrə namizədlərini irəli sürüblər. ANO hərəkatının rəhbəri Andrey Babiş baş nazirliyə namizəddir. Bundan əlavə, noyabrın 5-də "Azadlıq və Birbaşa Demokratiya"nın rəhbəri Tomio Okamura yeni parlamentin aşağı palatasının spikeri seçilib.

Keçmiş baş nazir Andrey Babiş gözləyir ki, yeni yaradılacaq kabinet dekabrın ortalarından gec olmayaraq işə başlayacaq. Bu yeni kabinet aşağı palatanın 200 üzvündən 108-nin dəstəyini qazanacaq, bu da ona parlamentdə aydın səs çoxluğu təmin edir və işləməyə imkan verir.