Cocuq Mərcanlıdan başlayan Böyük Qayıdışın sonrakı ünvanı Zəngilanın Ağalı kəndi oldu - Vüqar Rəhimzadə

Müzəffər Ali Baş Komandan, Prezident İlham Əliyevin rəhbərliyi ilə Azərbaycan Ordusunun 2020-ci il sentyabrın 27-də başladığı əks-hücum əməliyyatı nəticəsində Zəngilan şəhəri oktyabrın 20-də işğaldan azad edildi. Prezident İlham Əliyevin Sərəncamına əsasən, bu tarixi qələbənin əbədiləşdirilməsi üçün 20 oktyabr Zəngilan Şəhəri Günü kimi qeyd edilir. 44 günlük müharibə zamanı Silahlı Qüvvələrimiz Zəngilan şəhəri ilə yanaşı, rayonun 4 qəsəbəsini və 49 kəndini işğaldan təmizlədi. Bu zəfər, eyni zamanda, 30 illik işğalın həqiqətlərini gələcək nəsillərə çatdırmaq üçün bir çağırışdır. Zəngilanlılar 1993-cü ildə mühasirə şəraitində 67 gün vuruşmuş, 235 şəhid və itkin verərək Araz çayını keçməyə məcbur olmuş, sonda isə ölkəmizin 43 rayonunda müvəqqəti məskunlaşmışdılar. Milli Məclisin deputatı Vüqar Rəhimzadə bildirib ki, bəzi dünya gücləri erməni vəhşiliklərini inkar edə bilmirlər, çünki torpaqlarımız artıq danışır.

Deputat Rəhimzadə azad edilmiş ərazilərdə, xüsusən Zəngilanda aparılan geniş bərpa işlərinə və sakinlərin doğma yurdlarına mərhələli qayıdışına diqqət çəkib. Prezident İlham Əliyev İkinci Qarabağ müharibəsi dövründə xalqa qələbə müjdələrini çatdırarkən, Azərbaycan vətəndaşlarının tezliklə azad edilmiş torpaqlara qayıdıb rahat yaşaması üçün hər şey ediləcəyinə əminliyini ifadə edirdi. Bu gün bu vədlər reallığa çevrilib. Böyük Qayıdışın ilk ünvanlarından biri, Cəbrayılın Cocuq Mərcanlı kəndindən sonra Zəngilanın Ağalı kəndi oldu. Qələbədən dərhal sonra Ağalı "ağıllı kənd" prinsipi əsasında tamamilə yenidən quruldu. Sakinlər doğma yurd yuvalarına qovuşaraq, yeni evlərində həyata başladılar.

Ağalı kəndi modern texnologiyalar tətbiq edilərək, dünyanın ən müasir kəndlərindən biri kimi inşa edilib. Prezident İlham Əliyev və Birinci xanım Mehriban Əliyeva 2022-ci il 27 may tarixində bu layihənin birinci mərhələsinin açılışında iştirak etdilər. Kənddə 200 ev tikilmişdir, gələcəkdə əlavə evlərin və infrastrukturun genişləndirilməsi planlaşdırılır. Ağalıda məşğulluq, məktəb, uşaq bağçası, tibb məntəqəsi, habelə "ASAN xidmət" və DOST kimi xidmətlər mövcuddur. “Ağıllı kənd” konsepsiyası dayanıqlı inkişafı təmin etmək məqsədi daşıyır. Buraya informasiya texnologiyalarının tətbiqi, sosial-iqtisadi xidmətlərin keyfiyyətinin artırılması və resurslardan səmərəli istifadə daxildir. Layihə çərçivəsində, ümumilikdə 175 ailə, yəni 871 nəfərin məskunlaşması təmin olunub. Köçürülən ailələr peşə ixtisaslarına uyğun olaraq müxtəlif dövlət qurumlarında, ictimai iaşə obyektlərində, tikinti şirkətlərində və tikiş fabrikində işlə təmin olunacaqlar. Ağalıda ekoloji cəhətdən əlverişli "yaşıl" texnologiyalar və dayanıqlı enerji mənbələri üstünlük təşkil edir.

Zəngilan şəhəri də sürətlə yenidən qurulur. Nazirlər Kabineti 2023-cü ilin oktyabrında “Zəngilan şəhərinin 2040-cı ilədək inkişafına dair Baş planı”nı təsdiqləyib. Zəngilan mühüm nəqliyyat qovşağıdır. Zəngilan Beynəlxalq Hava Limanı istifadəyə verilməklə Şərqi Zəngəzurun hava qapısı dünyaya açılıb. Bu hava limanı bölgənin inkişafı və Zəngəzur dəhlizinin hava nəqliyyatı infrastrukturu ilə gücləndirilməsi üçün strateji əhəmiyyət daşıyır. Horadiz-Zəngilan-Ağbənd dəmir yolunun və Zəngilan-Horadiz avtomobil yolunun inşası da vacibdir. Bu yollar həm vətəndaşların, həm də yüklərin daşınmasında böyük rol oynayacaq, Naxçıvana yol açacaq. Rayon həm də böyük turizm imkanlarına malikdir və bərpa işlərində bu amilə xüsusi önəm verilir. İqtisadi imkanlara gəldikdə, Zəngilanda Azərbaycan və Türkiyə şirkətlərinin birgə müəssisəsi olan “Dost Aqropark” pilot layihəsi həyata keçirilir. Bu aqropark artıq fəaliyyətdədir. Layihə tam başa çatdıqda 500 nəfər işlə təmin ediləcək, Qarabağ məhsullarının dünya bazarına çıxarılması üçün “Aqro Market” də qurulacaq.

Millət vəkili Vüqar Rəhimzadə qeyd edir ki, sadalananlar son beş ildə görülən işlərin yalnız az bir hissəsidir. Prezident İlham Əliyev beş ildə Zəngilan rayonuna 10-dan artıq səfər edib. Dövlət başçısının 2020-ci il 23 dekabr tarixli ilk səfəri Zəngilan şəhərində Azərbaycan Bayrağının ucaldılması ilə tarixə düşdü. Bu günə qədər həyata keçirilən səfərlər Böyük Qayıdış Proqramının birinci mərhələsi üçün müəyyən edilmiş hədəflərin reallığa çevriləcəyinə inam yaradır. Artıq Qarabağ və Şərqi Zəngəzurda 6 şəhər, 2 qəsəbə və 20 kənd sakinlərinə qovuşaraq yeni həyata başlayıb. Zəngilan şəhəri də tezliklə bu sıraya qoşulacaq, həmçinin II Azərbaycan Milli Şəhərsalma Forumuna ev sahibliyi edən şəhər kimi ölkəmizin bu sahədəki təcrübəsini dünyaya təqdim edir.